На 17 март, Албанскиот Театар – Скопје ќе настапи на традиционалниот Фестивал на Државни Театри на Балканот кој се одржува во Бурса, Турција, со претставата „Русокосиот и Кучето“ во режија на Али Волкан Четинкаја.
Скопската публика ќе има прилика да ја проследи претставата „Русокосиот и Кучето“ на 12 март во Детскиот Театарски Центар (Чаршија) со почеток во 20.00 часот.
Во улогата на „Русокосиот“ е актерот Ибрахим Џемаили, „Кучето“ го толкува Илбер Муртези, а „Чуварот на затворот“, Агрон Биба.
Дејствието се одвива во една непозната географија, во непознато место и време… во една затворска ќелија. Русокосиот е 20 годишно момче, затворено во ќелија, раскрварен,и со едно уво изедено од глувци… Во ќелијата подоцна го носат и Куче. Двајцата се тука поради нивните грешки, но тие грешки се направени поради општеството кое не ги прифаќа.
Русокосиот е во затвор затоа тоа што ја запалил библиотеката во своето гратче, затоа што никогаш не му било дозволено да влезе во таа библиотека. Додека Куче е затворен поради убиства на кучиња. На неговите најдобри пријатели… кучињата.
Русокосиот непрекинато сака да излезе од таа ќелија… додека Кучето е многу свесен дека и да излезат од таму, нема каде да одат. Русокосиот постојано му зборува на Кучето за убавините надвоод ќелијата, за морето, за тоа како тој би пливал во тоа море, како би го учел и него да плива… Но, Кучето, иако не сака да му ја уништи надежта, го прекинува со тоа дека светот надвор не е нивен свет, туку е свет на тие кои го живеат со полна смисла, уживајќи во сите убавини на тој нивен свет.
Потоа, во ќелијата доаѓа уште една личност, како гостин, односно молејќи за спас. Тоа е чуварот, којшто бега од бунтот што се случува во затворот и како единствен спас ја гледа ќелијата. Иако, Кучето е доста агресивен кон чуварот, на крајот сепак ја доживува нивната милост. Чуварот си оди.,но, нешто заборава…
М. Л.