пишува: ДРАГАН МИШЕВ
Антиваксерскиот протестен балон издиша како дупнат со игла
По низата крајно негативни коментари и остри реакции во јавноста за говорот на омраза на неделниот антиваксерски и антиковид протест на неформална група граѓани за кој известуваше ЦИВИЛ Медиа, гласно најавуваното продолжување на истиот за вчера , во исто време и на исто место, и нормално во уште поголемо присуство, изостана.
Во меѓувреме, по острата осуда на говорот на омраза, особено кон докторите , од страна на Лекарската комора, Здружението на млади лекари, како и барањето на Здружението на новинари за заштита на медиумските работници кои присуствуваа на протестот, во текот на вчерашниот ден имаше и немушти обиди за извинување за говорот на омраза од страна на некои гласноговорници на протестот – Гордана Гоџо „не е знајала„ дека на нејзиниот говор во моментот кога ги спомнала докторите, публиката меѓу другото ги извикувала и зборовите „убијци“.
Сепак ,за разлика од лекарските здруженија кои остро реагираа на говорот на омраза, новинарските здруженија , со срамежливото споделување на своите реакции на говорот на омраза, како да ги изневерија очекувањата на медиумските работници за гарантирање на нивната безбедност при извршување на работните задачи. Дури и некои опозициски медиуми протестите ги искористија за собирање ситни политички поени, додека нивните ментори јавно не изразија ниту поддршка, ниту осуда на овој настан.
По ваквиот дебакл на протестот, организација за нов протест закажан за денеска пред Влада во 19 часот (да залади малку, нели, нема да се „варат’’ во име на „слободата’’) ја презедоа други два Фејсбук профили, Давид Давит и Сандра Софкоска, со наслов СТОП ЗА ОДЗЕМАЊЕ НА СЛОБОДАТА 2.0??? каде што слободно повикуваат на мирно собирање во одбрана на ускратеното право на мирно собирање, како што наведуваат во повикот, едно од според нив ускратени права: 1. Право на слобода, 2. Право на слобода на движење, 3. Право на приватност, 4. Право на слобода на мисла, 5. Право на мирно собирање.
Иако со истата нејасна ретроградна нарација, овој пат организаторите повикуваат на мирен протест, но судејќи според коментарите на членовите на антиваксерските групи, преполни со навреди и говор на омраза, тоа ќе биде тешко остварливо.
И тука се случува еден своевиден парадокс. Со интензивирањето на говорот на омраза и навредите од страна на антиваксерите преку социјалните мрежи и на протести, упатени кон вакцинирањето, вакцинираните, докторите, министерот, Владата, во исто време се зголемува бројот на вакцинирани лица во земјава. Дали антиваксерите, ненамерно, се ставија во служба на имунизацијата?
Можеби здравствените служби во земјава треба да им заблагодарат на антиваксерите за зголемениот интерес за вакцинација кај населението и зголемениот број на вакцинирани , кој според информациите на Министерството за здравство, во текот на вчерашниот ден прва доза примиле 11.925 граѓани, а вкупно се вакцинирале 16.955 граѓани, со што заклучно со вчера вакцинирани се вкупно 624.819 граѓани. Во државата вкупно се аплицирани 1.115.988 дози вакцини, а ревакцинирани се 491.169 граѓани.
