„Специјалното јавно обвинителство не е формирано за да работи во определен рок, туку за да ја заврши работата, да ги истражиме сите снимки со кои располагаме“, изјави Специјалната јавна обвинителка Катица Јанева, апелирајќи до сите граѓан(к)и, доколку имаат и други снимки, и нив да ги достават до СЈО.
„Моралните вредности во Македонија се изместени во изминатите 10 години со владеење на оваа гарнитура. Тоа го слушнавме во објавените прислушувани разговори, а тоа може да се заклучи и од необјавените разговори. Најважно е што бил злоупотребен избирачкиот процес од лукративни причини, само за да останат на власт. Со уцени и други криминални дела, вршеле притисок врз финансиери, правни лица и фирми, за да се здобијат со финансиски средства – да останат на власт“, вели Јанева во интервјуто за „Дојче Веле“.
Специјалната јавна обвинителка очекува поранешниот премиер Никола Груевски да биде изведен пред суд.
„Ние мора да ги поднесеме нашите обвиненија за кои имаме докази, но останува одлуката на судот – да донесе обвинителна или ослободителна пресуда. Ние сме само обвинители, наша работа е да собереме докази за одредени криминални дела на одредени личности и да докажеме дека сите се еднакви пред законите во Македонија“, потенцира Јанева, која посочува и дека преслушувањето на прислушуваните разговори е тешка и макотрпна работа, но дека СЈО останува да биде на висина на својата задача.
Мандатот од 18 месеци за работа на СЈО истекува на крајот на јуни годинава.
ЦИВИЛ – Центар за слобода постојано инсистира на потребата да се продолжи мандатот на СЈО. Дел од причините за ова барање се криењето и уништувањето на доказите, противуставната аболиција на претседателот Иванов, стигматизацијата во јавноста, заплашувањето на сведоците, блокадите од судовите и другите институции и низа други форми на опструирање на работата на СЈО.
