Убавка Јаневска, долгогодишна новинарка, во интервју за ЦИВИЛ Медиа зборува за слободата на изразување, за медиумските слободи, за уредништвото како поттик за новинарите и притисоците со кои таа се соочила во текот на својата работа.
ЦИВИЛ Медиа: Што за вас претставува слободата на изразување, медиумиските слободи и активизмот?
Јаневска: Слобода, граѓаниниот да може без страв да го соопшти сопствениот личен став по сите актуелни, па и неактуелни прашања во локалната заедница. Новинарот да може слободно, без да се самоцензурира, да го напише сопствениот текст и да го објави. Сметам дека слободата може да мотивира што поголем број на граѓани да пристапат во граѓанските организации и на тој начин, во позитивна смисла, да делуваат во реализација на активностите, пред сѐ, дебатите, трибините, тркалезните маси, кадешто се отвораат суштествени теми за животот во локалната заедница.
ЦИВИЛ Медиа: На кој начин ги поддржувате или можете да ги поддржите слободата на говор и медиумските слободи?
Јаневска: Преку пишување на текстови во коишто новинарот изворно ќе ја пренесе информацијата на граѓаните. Се разбира, ќе ги извади најсуштествените моменти, или аргументи и ќе презентира навистина вистинита, точна и навремена информација.
ЦИВИЛ Медиа: Дали се соочувате со политичките и бизнис центрите на моќта и како се справувате со истите?
Јаневска: Со притисок не сум се соочила, освен со државна институција, ако можеме така да го наречеме Министерството за внатрешни работи на Република Македонија, зборувам за периодот пред април, кога од мене лично беше побарано од страна на полицаец, да ги избришам фотографиите што јас ги снимив во Велес, кога стигнав, меѓу првите, на местото каде беше запалено возилото на командирот на полициската станица во Велес. Одговорив категорично дека тоа нема да го сторам. Повторно, откако полицаецот отиде во домот на командирот, бев замолена да ги избришам информациите. Бидејќи дадов отпор и кажав дека тоа нема да го сторам, туку дека доколку тој смета дека сум направила некаков законски прекршок, може да ме приведе во полициска станица. Како резултат на таквото однесување по неколку месеци, обидувајќи се да добијам информација на телефонскиот број 192 за можна сообраќајна несреќа, бев пцуена по телефон, од дежурниот полицаец, којшто беше на смена.
До денеска не сум се соочила со друг вид на притисок којшто доаѓа од политичари или пак од бизнис центрите на моќ.
ЦИВИЛ Медиа: Кои се вашите препораки во контекст на борбата за слободни медиуми?
Јаневска: Поддршка на уредникот за новинарот. Изградената релација на доверба меѓу новинарот и уредникот, сметам дека е клучен момент во целата оваа приказна, или тема за којашто ние денеска зборуваме. Искуството од мојата работа пред 11 години во повеќе медиуми, уредникот беше тој кој ми значеше многу и ме поттикнуваше секако да ја пренесам вистинската информација, вистината од терен. Сметам дека треба повторно, во овој период којшто ни следува, да ни биде некаква ѕвезда водилка. Таа поддршка што тогаш ја имавме, комплетно одговара како одговор на поставеното прашање.
Маја Ивановска
Камера: Дехран Муратов
Монтажа: Ермин Климента