Министрите за финансии имаат значајна улога во забрзување на акцијата за ублажување на климатските промени во јавниот сектор и да создадат услови што ќе овозможат приватниот сектор да ги зголеми зелените инвестиции. Ова, како што соопшти Министерството за финансии, е пораката од Состанокот на Глобалната Коалиција на министри за финансии за климатска акција, на која учествува министерот Фатмир Бесими, а се одржа во рамки на Годишните средби на ММФ и Светска банка во Маракеш, Мароко.
Министерот за финансии Фатмир Бесими во август оваа година, беше избран за полноправен член на оваа Глобална коалиција, во која членуваат министри за финансии на 90 држави и претставници на 26 институционални партнери, а која има за цел координирање на активностите на министрите во насока на почитување на преземените обврски од Парискиот климатски договор и Хелсиншките принципи за климатска акција.
-Зелена економија е отпорна економија, која пружа подобри услови за живот за сите граѓани, затоа нашата определба е обезбедување забрзан економски раст кој се заснова на зелени инвестиции. Тоа е приоритет кој е поставен во повеќе стратешки документи на Владата и Министерството за финансии, а коишто се компатибилни со мисијата на Коалцијата. Го усвоивме Планот за забрзан економски раст во кој приорирет е заштита на животната средина, рече министерот Бесими.
Тој истакна дека минатата недела направени се два системски значајни чекора кон развојот на зеленa економија со усвојувањето на Законот за Развојната банка со кој се формира Фонд за енергетска ефикасност и издавањето на првите зелени обврзници како извор за финансирање зелени проекти.
-Фондот ќе функционира како организациска единица во рамки на Развојната банка на Република Северна Македонија и преку издавање грантови, поволни кредити и гаранции ќе поддржува проекти за енергетска ефикасност и заштита на животната средина од јавниот и приватниот сектор. Почетниот капитал е во износ од 15 милиони евра, од кои 5 милиони евра се преку Проектот за енергетска ефикасност од Светската банка и 10 милиони евра од издадените зелени обврзници. Во иднина тој ќе се надополнува од нови емисии на зелени обврзници и други извори на финансирање, стои во соопштението од МФ.
Зелените обврзници како нов инструмент беа воведени на пазарот минатата недела со одржување на првата аукција на која беше запишана сума од 600 милиони денари, износ кој ќе биде внесен во Фондот за енергетска ефикасност. Станува збор за државни хартии од вредност чија намена е поддршка на зелените проекти во земја, односно финансирање проекти од енергетската ефикасност и животната средина, а со цел да го забрзаат зелениот раст, но и да го развијат пазарот на капитал во земјава, преку диверзификација на понудата со нови инструменти.
По учеството на Министерскиот состанок, министерот за финансии Бесими, во рамки на годишните средби на ММФ и Светска банка во Маракеш, утре ќе се сретне со високи претставници на двете меѓународни финансиски институции, додека задутре ќе има средби со претставници од значајни меѓународни финансиски институции.
