Штип нѐ дочека мирен, сончев и ветровит, како да не го допираат апсењата и политичкиот панаѓур во Скопје. Повозрасните, испоседнати по клупите, а терасите на кафулињата полни со млади.
СЛОБОДНИ МЕДИУМИ ЗА СЛОБОДНО ОПШТЕСТВО
Поставувањето на штандот Слободни медиуми за слободно општество веднаш предизвика големо внимание.
Граѓан(к)ите заинтересирано му приоѓаа на штандот. „Цивили, што има ново?“ нѐ прашуваат. Една граѓанка зема примерок од њузлетерот „Слободно општество“ и мавта кон својата пријателка на клупите велејќи „ЦИВИЛ е тука, дојди да ги прашаш лично!“ Инфо штандовите на ЦИВИЛ често се користат и како можност луѓето да споделат по некоја своја мака, да прашаат за совет, да споделат информации или да го изразат своето мислење за некоја тема…
Со раното заоѓање на сонцето, станува уште постудено, но активностите не стивнуваат. Дел од тимот се задржува на плоштадот и разговара со граѓанките и граѓаните. Членови, поддржувачи и набљудувачи на ЦИВИЛ дојдоа да поразговараме за нашите следни чекори. Еден дел од тимот заминува на други локации, по задачи поврзани со други проекти.
ОД РАЗБИРАЊЕ ДО ОДБРАНА
Преку анкета меѓу граѓан(к)ите, на прашањата што е слобода на изразување и дали медиумите се слободни, можеше да се види дека промените полека, малку несигурно, но опипливо се случуваат и на локално ниво.
Во меѓувреме, во комуникација со локалните медиуми, новинарската екипа на ЦИВИЛ разговараше со сопствениците, уредниците и новинарите, но и со граѓанските активисти со цел идентификување, разбирање и одбрана на слободата во медиумите.
Преку оваа комуникација и видео интервјуата што ги спроведе ЦИВИЛ Медиа, како дел од проектот Од разбирање до одбрана, се истакнаа предизвиците, но и потребите на медиумските работници за ослободување на сѐ уште заробениот медиумски простор.
ГРАЃАНСКИ ОБЈЕКТИВ
Во попладневните часови, младите штипјанки и штипјани се запознаа со улогата на граѓанското новинарство и неговото влијание не само во медиумската сфера, туку во донесувањето на одуки и промени на локално и национално ниво.
Веќе трета година проектот Граѓански објектив им овозможува на сите граѓанки и граѓани самостојно, со фотографија или видео запис, да известуваат и информираат за проблемите со кои с соочуваат во нивното секојдневие.
На двочасовната работилница, учесниците имаа многу примери што укажуваа на реалната состојба во Штип и на проблемите на граѓанките и граѓаните што допрва треба да се решаваат.
ЦИВИЛ продолжува и понатаму со теренските активности низ Македонија, повикувајќи ги медиумите, активистите и претставниците на граѓанското општество да се запознаат со активностите на организацијата и активно да учествуваат во нив.
ЦИВИЛите се секогаш активни и на располагање за соработка и комуникација, затоа што: „Сите временски прилики се погодни за активизам“.
Биљана Јордановска
фотографии: Биљана Јордановска, Горан Наумовски