Бугарскиот премиер Бојко Борисов, по денешната средба со неговиот македонскиот колега Зоран Заев во Софија, изјави дека Бугарија е за единствена Македонија и за нејзиното членство во НАТО и ЕУ! Тој истакна дека Македонија веќе е внатрешно-политички стабилизирана и оти има историска шанса да направи нејзините граѓани да се чувствуваат подобро.
Борисов, исто така, истакна оти е многу важно да има инфраструктурно поврзување меѓу двете земји и вети дека ќе работи со Грција за решавање на сите отворени прашања.
Заев изјави дека Бугарија, како прв сосед, сака да ѝ помогне на Македонија да се интегрира во НАТО и ЕУ, посочувајќи дека со Борисов разговарале за приближување на ставовите во врска со договорот за добрососедство, како и дека е договорено заедничко чествување на празникот Илинден на 2 Август во Македонија, кога со Борисов ќе го потпишат Договорот за добрососедство.
Разговарано е и за тоа во Софија да се именува улица со името на покојниот претседател на Македонија, Борис Трајковски, а во Скопје да се именува улица по поранешниот бугарски претседател д-р Жељу Желев, една од најзаслужните личности за меѓународното признавање на нашата земја.
