„Македонија нема веќе време за губење и што побрзо треба да се формира стабилна политичка влада“, изјави претседателот на ДР-ДПА, Зијадин Села, во емисијата „10 Минути“ на ТВ21. Според него, новите избори нема да бидат решение, туку ќе ја продлабочат кризата. Тој истакна дека доколку се распишат нови избори, ќе ги повика албанските партии да ги бојкотираат изборите.
„Албанските политички партии не треба да прифатат избори заради тесни политички интереси, нивни, па и на некои македонски политички партии, поточно, на некои лидери кои сакаат да си ја спасат главата“, вели Села.
Села додаде дека новата влада треба да има сериозен пристап и да ја разгледа можноста и за промена на името, со цел Македонија да стане членка во евро-атлантските структури. Тој потенцира дека Заев треба да се изјасни за Платформата на албанските партии и да не чека претседателот на државата Ѓорѓе Иванов да му го додели мандатот, бидејќи, како што рече, тоа може да не се случи.
„СДСМ не треба преку прес-конференции да бара некој да му го подари мандатот, и доколку сака да формира влада, ќе треба да почне преговори со албанските политички субјекти. Го сакал јас тоа, или не, за жал, најпрвин со ДУИ, затоа што тие ги имаат бројките, без нивните бројки не може да се прави никаква комбинација за влада”, изјави Села, во емисијата „200“ на ТВ Алсат-М.
Движењето Беса ја прашува ДУИ – уште колку време и аргументи ѝ требаат за да го разбере антиалбанскиот став на ВМРО – ДПМНЕ? Потпретседателот на партијата, Зеќирија Ибрахими, за ТВ Алсат М, изјави дека се подготвени да гласаат во Собранието за новата влада, доколку Иванов му го даде мандатот на лидерот на СДСМ, Зоран Заев.
„Ние не криеме дека доколку е во интерес заминувањето на ВМРО-ДПМНЕ и на ова нејзино раководство од политичката сцена на Македонија, можеме да разговараме со Заев за парламентарно мнозинство“, изјави Ибрахими.
Сепак, и покрај изразената подготвеност за соработка со Заев, од Движењето Беса велат дека за модалитетите ќе разговараат откако лидерот на социјалдемократите ќе го добие мандатот.