Categories

ПАРТИИ Беса, новата партија во составот на Владата на Република Македонија

Движењето Беса е една од најновите политички субјекти во Република Македонија, формирана во 2014 година од Зеќирија Ибрахими, Билал Касами и Африм Гаши. Политички позиционирана како десничарска, социјал-конзервативна партија, со примарен интерес за развојот и напредокот на социјално, културно, политичко и економско ниво на албанската етничка заедница со главен фокус на општина Чаир во Скопје, којашто е повеќегодишен бастион на партијата Демократска Унија за Интеграција (ДУИ).

На предвремените парламентарни избори што се одржаа на 12 декември 2016 год, Беса се пласира на четврто место по добиени 57.868 гласови, и 5 пратенички места, со неколку поднесени  претставки за нерегуларности во изборниот процес, од кои Државната Изборна Комисија зема во предвид само една. На локалните избори на 15 октомври 2017 година, Беса финишира со еден градоначалник и 63 советници, а во општина Чаир беше во тесна трка со кандидатот Зеќирија Ибрахими против кандидатот на ДУИ Висар Ганиу, во три изборни круга. Во општина Чаир градоначалничкото место го освои кандидатот од ДУИ. Иако во опозиција, Беса го поддржа формирањето на новата влада на Зоран Заев.

По последните локални избори, Беса се соочува со внатрешни недоразбирања  и инциденти помеѓу скопскиот и тетовскиот огранок, по што се дели на Беса на Билал Касами, и Беса на Африм Гаши. Двата ограноци до неодамна беа во преговори со премиерот Зоран Заев за приклучување кон владата. Во тоа успеа  огранокот на Африм Гаши. Премиерот најави дека Министерството за култура ќе премине во рацете на Беса, а според најновите шпекулации, нов министер за култура ќе биде Зеќирија Ибрахими. Тој ја демантираше оваа шпекулација, велејќи дека и доколку му ја понудат позицијата на министер за култура, ќе ја одбие.

Д. Тахири

Print Friendly, PDF & Email