ЦИВИЛ: Не само апанажите, да се укинат и неразумните трошења и привилегии на функционерите
ЦИВИЛ ја поздравува судска одлука за укинување на апанажите на функционеритеа кои ќе бидат разрешени или ќе си дадат оставка. Одлуката ја донесе Уставниот суд на седницата на 1 март 2023 година. Уставните судии го укинаа членот 22 од Законот за плата и другите надоместоци на избрани и именувани функционери. Овој член предвидуваше – пратеник, функционер и раководен работник кој поднел оставка или е разрешен од должноста пред истекот на времето за кое е избран, именуван или назначен да ги има сите права како останатите функционери меѓу другото и право на надоместокот популарно наречен „апанажа”.
ЦИВИЛ пред 4 години, на 17 мај 2019 година, започна иницијативата „Крај за расипништвото“, со поднесени барања до Собранието за укинување на привилегиите на функционерите која сè уште е актуелна и ќе остане додека не се укинат сите повластици, почнувајќи од поранешните претседатели, завршувајќи со раководителите на државните агенции и други институции, односно да се редуцираат до ниво што е прифатливо за една земја која се декларира како социјална држава, според Уставот.
ИЗЈАВА НА ДЕНОТ
Дескоска: Многу врева за ништо
Укината апанажа или „многу врева за ништо“?! Не сакам да бидам „расипувач на забави“, но сметам дека треба да си го поставиме прашањето дали ефектот на вчерашната одлука на Уставниот суд ќе биде укинување на апанажата во случаи на разрешување и оставка, напиша на Фејсбук професорката по уставно право и поранешна министерка за правда, Рената Дескоска.
ФЛЕШ ВЕСТИ
ЛЕБ И денеска на полиците во маркетите нема леб, пекарите остануваат на одлуката од понеделникот дека производство и испорака нема да има.
ЕКОНОМИЈА Новите методологии за утврдување на минималната плата и пензиите резултираа со раст на примањата на граѓаните за месец март. Постојано расте и просечната плата.
БОМБИ Закани за поставени бомби утрово пристигнале на електронските адреси на 18 училишта во Скопје, каде во тек се антитерористички проверки, соопшти МВР.
СРЕДБА Охрид ќе биде градот каде што ќе се одржи средбата меѓу Косово и Србија, која е најавено дека ќе се одржи на 18 март.
ВОЈНА ВО УКРАИНА
Приведен Русин поради антивоени цртежи на неговата 12-годишна ќерка
Русинот Алексеј Москаљов е приведен поради давање антивоени изјави, а неговата 12-годишна ќерка привремено е ставена под државна грижа, откако семејството се соочило со притисок од властите поради цртежите што девојчето ги направило на училиште на кои е прикажана Русија како бомбардира семејство во Украина, пренесува Гардијан.
АНАЛИЗА – Војската на Путин заглавена во кал како онаа на Хитлер во 1941 година
Калливата сезона – позната во Русија како „распуница“, а понекогаш и прекар „Генерал Кал“ – го погоди напредувањето на Хитлеровите Панцири кон Москва во 1941 година, и често е заслужна за спасувањето на советската престолнина од германската окупација.
Осумдесетина години подоцна, путиновата окупаторска армија ја дочека истото што и Хитлер при неговиот обид за освојување на Советскиот сојуз во втората светска војна.
АЛ-ПРЕС
Опозицијата во албанското собрание денеска ќе има маратонска седница на која бараат физичко присуство на премиерот Рама, за да дебатираат за аферата „Мекгонигал“, а лидерот на демократите Сали Бериша најави дека протестите ќе продолжат на 3 март и покрај судската одлука. Според американскиот амбасадор во Косово, Ховениер, признавањето на Косово е еден од условите за членство на Србија во ЕУ.
Ова е дел од изборот на редакцијата на ЦИВИЛ Медиа, од главните теми во албанските медиуми во регионот за денешното издание на АЛ-ПРЕС.
СЛОБОДНА ЗОНА
„Медиумските здруженија во државава ни, чија задача е нели да ја бранат слободата на известување, слободата на говор и разоткривање на вистината, се пикнаа во дупка и еве веќе пет дена глава не покажуваат. Никаква реакција ни од славниот ЗНМ, ни од борбениот ССНМ.“, извадок од колумната „Кој ќе го измие срамот на новинарските здруженија по не-реакцијата на атаците од Мицкоски“, од Јане Ѓорѓиоски.
Д. Тахири