На јавниот настан „Аларм: Слободни избори, услов за кој (не) се преговара“ во организација на ЦИВИЛ, Џабир Дерала, како претставник на организацијата, ги истакна сите препораки од мониторингот на локалните избори 2017, кои во голем дел се повторуваат во сите досегашни изборни процеси.
„ЦИВИЛ повика на максимална заштита на правото на глас на граѓанките и граѓаните, на решителна акција против политичката корупција која е широко распространета, како и против купувањето на гласови… ДИК мора да се професионализира и да биде независна, а не предмет на политичка корупција. ЦИВИЛ бара сериозна ревизија на Избирачкиот список. Изборниот законик има сериозни недостатоци, а институциите како да се присетија на него во пресрет на избори…“, истакна Дерала, преку бројни, конкретни примери што укажуваат на недоследностите во изборните процеси.
Тој истакна дека ЦИВИЛ со години наназад бара Македонија да биде една изборна единица со што ќе се демократизираат изборните процеси, целото општество и ќе се даде простор за политичко изразување и на помалите политички партии.
„Досега за една изборна единица гледаме дека само декларативно зборува премиерот, но не гледаме поместување по ова прашање дури ни од помалите политички партии во чиј интерес е решавањето на ова прашање. Исто така, бараме и заострување на критериумите за политичкото финансирање. Во моментот имаме ситуација во која финансирањето за време на избори им овозможува на некој начин на политичките партии да ги штелуваат своите финансиски извештаи, бидејќи со Пржинскиот договр имаат дополнително време за нивно објавување, односно штелување“, изјави Дерала.
За медиумите, Дерала изјави дека овој јавен настан е аларм, предупредување дека изборите бргу ќе дојдат, а процесот за подобрување на изборите е бавен и недоволно транспарентен.
„Државната изборна комисија ја видовме како една од најодговорните институции која грубо го повреди правото на глас на изборите во 2016 и 2017 година. Тоа треба да се регулира со професионализирање на ДИК со што ќе се даде предност на словото на законот, а политичките влијанија ќе се исчистат“, изјави Дерала.
Говорници на настанот беа и Хедер Роберсон Гастон (САД), Сашо Орданоски, и Александар Новакоски.
Биљана Јордановска
Камера: Атанас Петровски
