Дерала, ЦИВИЛ: „Долгорочните набљудувачи на ЦИВИЛ веќе подолго време ги набљудуваат состојбата, настаните и процесите поврзани со референдумското изјаснување на 30 септември. Во период од повеќе месеци, мониторираат над 30 набљудувачи на ЦИВИЛ. Тоа особено се интезивира, се разбира, со почетокот на септември“.
„На почетокот на месецот, ние забележавме низа проблеми кои се однесуваат на правото на глас на граѓанките и граѓаните. Пред сè, се работи за низа случаи во кои граѓанките и граѓаните се под силна пресија како на онлајн медиумите и онлајн мрежите, социјалните мрежи, така и во секојдневниот живот. Тие се соочуваат со закани и притисоци да гласаат ‘против’, да се приклучат на движењето за бојкотирање на овој процес, меѓутоа исто така, се забележуваат и неколку случаи во кои тие трпат притисоци и да гласаат ‘за’…
Овие притисоци ги забележуваме на сите нивоа и во повеќе општини во Република Македонија. Со детални извештаи секако дека ќе излеземе во текот на оваа недела, за да можеме да предупредиме на овие појави. Она што најмногу ја засегнува нашата работа за мониторинг на референдумот, се однесува на една крајно незаконски и недозволена постапка, односно, активност, а тоа е дека одредени структури нудат пари. Веќе ги знаеме и износите на парите што им се нудат на социјално загрозени семејства за да ги предадат своите лични документи на 29 септември, а да ги добијат назад на 1 октомври. И, со тоа да бидат оневозможени да го искористат своето право на глас. Поточно, ние веќе имаме седум општини во коишто се забележуваат вакви случаи во овој момент. Ги алармираме институциите да преземат мерки и решително да санкционираат ваква незаконска и недозволена активност на одредени структури и тоа сметаме дека мора да се направи час поскоро. Со нашите информации, им стоиме на располагање на институциите за да можат да преземат мерки според законот…
Тоа што постојано го апелираме, би сакале и во оваа прилика да го направиме: на говорот на омраза граѓаните да не одговараат со говор на омраза! Бидејќи говорот на омразата го радикализира општеството, го дели и понатаму општеството и придонесува кон тензии, а се разбира и со тоа води кон безбедносни предизвици за целата земја. Заради тоа, на говорот на омразата – без говор на омраза, туку со аргументи и се разбира, со насмевка“.
Содржината е дел од граѓанската иницијатива „Зачекори напред!“, финансирана од Фондацијата Отворено општество – Македонија. Содржината е единствена одговорност на авторите и на ниту еден начин не може да се смета дека ги изразува гледиштата и ставовите на граѓанската иницијатива „Зачекори напред!“.
