Џабир Дерала, претседател на ЦИВИЛ, на панел дискусијата на ЦИВИЛ: „Интегритетот на изборните процеси и демократската отпорност – Предизвици и решенија“, дел од меѓународната конференција „Одбрана на демократијата: Боиште на вистината“, истакна дека на авторитарните режими не им е битно да убедат некој дали е факт или вистина, ним им е битно да предизвикаат недоверба, страв и несигурност.
„Не можеме да зборуваме за вистински демократски процеси кога збориме за изборни процеси на Западен Балкан. Во тој контекст Западен Балкан предничи во искористување на национализмот и националистичката омраза во најевтината инвестиција со нависок профит, а тоа се изборите“, изјави Дерала.
Тој додаде дека најевтино се инвестира во национализмот, а се добива голем профит. Имаме политичка култура оној што ја добива власта добива се, а оној што губи ќе изгуби се.
„Ние имаме ситуација во која изборниот процес е целосно заробен како од комплексните операции на пропагандните машинерии, но истовремено има заробување на стратешки важните институции во системот како што е ДИК, па завршувајќи со оние што се занимаваат со корупција, дискриминација, владеење на правото. Но најважни се медиумите. Тие што го контролираат наративот им требаат медиумите за дистрибуција, со што едноставно се прегазува волјата на гласачите, се прегазува демократската димензија на изборите и ја претвораат во илузија на демократијата“, истакна Дерала.
Дерала истакна дека сите независни канидати не се баш независни, кои може да предизвикаат конфузија во изборниот процес.
„Гласачите си ги знаат изборните права, но кога се ставени во позиција да земат 500 денари со кои ќе купат леб, тогаш не вреди тоа дека тие си ги знаат правата, кога државата и системот не им овозможи подобар животен стандард“, рече Дерала.
Тој додаде дека треба постојано да се бара транспарентност од институциите. Треба да се направи дигитална и медиумска писменост на граѓаните. Донаторите треба да му помогнат на истражувачкото новинарство, не на рекетарското новинарство.
Б. Ј.
монтажа: Ариан Мехмети
камера: Атанас Петровски
Панелот е дел од меѓународната конференција “Одбрана на демократијата: Боиште на вистината“, како дел од проектот „Демократски навигатор“, поддржан од Сојузното министерство за надворешни работи на Сојузна Република Германија.
