Претседателот на Државната изборна комисија, Оливер Деркоски на конферецијата „Какви избори, таква иднина“, која ја организираше ЦИВИЛ – Центар за слобода, зборуваше за Изборниот законик донесен во 2006 година, којшто досега доживеа дури 30 измени.
„Во нормалните, стандардни процедури, во законодавството се вели дека веднаш треба да се донесе нов Изборен законик. Овој постоечкиот, повеќе не е употреблив за работа!“, смета Дерковски.
Дерковски во својот говор ја потенцираше обврската на ДИК да се придржува до имплементацијата на законскиот текст, па затоа, во ДИК многу често се соочуваат со неможноста да имплементираат некоја одредба, што само го потврдува нивниот став дека итно се потребни промени, односно носење на нов Изборен законик.
„Флоскулата – коректни и чисти избори, коишто претставуваат услов за нашите евроинтеграции, ја слушаме секој ден. Меѓутоа, она што треба да го направиме како држава, за да добиеме чисти и коректни избори, е сите чинители коишто се вклучени во својот изборен процес, да си ја сфатат својата обврска, на правилен начин, се со цел, на крајот на денот, на 21 април и на 5 мај, да добиеме позитивна оценка“, смета Деркоски.
Според Државната изборна комисија, најголемата слабост на изборните процеси во земјата се избирачките одбори. Ставот на Комисијата е дека во иднина треба да се размислува за начинот на избор, но и за составот на избирачките одбори.
„За таа цел, ние подготвивме нова програма за обуки на избирачките одбори којашто, за разлика од минатите изборни процеси, не се одвива на два дена пред изборите, туку веќе со месеци континуирано се вршат обуки на претседателите, замениците-претседатели и членовите на избирачките одбори“, рече претседателот на ДИК.
Меѓу другото, Деркоски на конференцијата презентираше и дел од новините кои ги воведува ДИК, како обучувачите од здруженијата за лица со посебни потреби, за организирање на гласање во старски домови.
Како еден од најгорливите проблеми, Деркоски го посочи и проблемот со гласачите од дијаспората.
„За овие избори ќе се потрошат речиси 30 милиони денари за 1.782 лица, коишто се пријавиле да гласаат во дијаспората, а од искуство, веројатно нема да гласаат сите. Ова ќе биде најскапиот глас, од дијаспората. И ова наметнува една дилема којашто мора да ја разрешиме во идниот период. Јас не сум за тоа да им се одземе, еднаш веќе даденото право, на нашите граѓани. Но, постојат и други проблеми, како невозможноста да се лоцира бројката на граѓани во дијаспората, затоа што никој од нашите граѓани кога ја напушта државата, не го пријавува своето отсуство од државата повеќе од една година. Тоа е проблем, којшто дополнително го оптеретува системот и организацијата на изборите. Меѓутоа, постојат многу начини на коишто може да се промени модалитетот и начинот на гласање на тие луѓе, со цел да им овозможиме учество на тие граѓани во нашите политички процеси и да им овозможиме да гласаат“, рече Деркоски.
Маја Ивановска
Камера: Трпе Стојановски
Монтажа: Ариан Мехмети