ЖАРКО ТРАЈАНОСКИ
Активисти на партијата Левица на 24.12.2021 ширеа дезинформации и поттикнуваа нетрпеливост и омраза на социјалните мрежи, во врска со гостување на „албанска танцувачка група“ на меѓународен фестивал во Турција во октомври 2021.
Дезинформации и омраза на „Твитер“
Јована Мојсоска, членка на президиумот на Левица, и носителка на листата на советници за општина Струга, на својот Твитер профил објави „На меѓународен фестивал во Турција испратиле албанска танцувачка група додека секоја држава ја презентира културата на својата конститутивна нација. Албанците имаат друга држава за да ги презентира, додека македонската нација ја има само оваа држава и нејзините културни особености.“
Твитот на Мојсоска, беше споделен од други твитерџии со моментари кои поттикнуваат нетрпеливост и омраза врз етничка и политичка основа.
Дезинформации и омраза на „Фејсбук“
Дезинформации и меѓуетничка нетрпеливост и омраза продолжија да се шират и на фејсбук страницата на „Ленка“ .
Покрај содржината од твитот на Мојсоска, во постот на „Ленка“ е содржано потпалувачко толкување маскирано како факт, дека „конститутивниот македонски етникум“ бил „целосно разорен“: „Северна е претворена во племенска заедница на етникуми, постмодерен експеримент каде конститутивниот македонски етникум како КОХЕЗИВЕН елемент и јадро на државата е целосно разорен!“, при што се бара итна оставка од министерката за култура.
Дезинформациите на „Ленка“ беа споделени и од неформалниот партиски лидер Димитар Апасиев, и од други советници и активисти на „Левица“. Дел од коментарите укажуваат дека ваквите дезинформации предизвикале не само нетрпеливост и омраза врз етничка и политичка основа, туку и отворени повици за насилство („Бесилка за оваа стока“).
Весна Кираџиева, кандидатка на „Левица“ за градоначалник на општина Аеродром, го сподели статусот на „Ленка“ со непоткрепени обвинувања за „бришење на македонскиот идентитет на секоја основа“, „за бришење на Македонија, македонската култура и нација“ и дезинформации и потпалувачки говор.
Дезинформациите и говорот кој поттикнува нетрпеливост и омраза на порталот „Антропол“
Дезинформациите и говорот кој поттикнува нетрпеливост и омраза беа проширени и надградени од порталот „Антропол“, во написот Ленка: На меѓународен фестивал Македонија е претставена само од албанска танцувачка група.
Во написот се обвинува Министерството за култура предводено од министерката Ирена Стефоска, дека „испратило албанска танцувачка група да ја презентира традиционалната култура на Република Македонија“, што министерката го демантираше.
Исто така, дополнително во написот од „Антропол“ се тврди дека културата на етничките Албанци, државјани на Македонија, не требало да биде претставувана од нивната држава Македонија, туку од Албанија, која била нивна држава: „Албанците имаат своја држава и култура која е повикана да ги претставува нивните традиции, додека македонскиот народ ја има само оваа држава и нејзините културни особености како свој единствен дом.“
Во написот од „Антропол“ се обвинува „министерката и нејзиниот државен секретар Валмир Азири“ дека „очигледно сакаат да испратат порака до македонскиот народ, дека северна de fakto е веќе федерација со два конститутивни народи.“ Исто така, во написот од „Антропол“ се содржани и дополнителни дезинформации, теории на заговор, и непоткрепени обвинувања за „големоалбански шовинизам“: „…Македонија е претставена преку носии и танци на друга нација (во случајот албанската), со цел во јавноста да се создаде погрешна претстава дека и албанскиот народ е конститутивен народ во оваа држава, а не етникум, со што уште еднаш на дело се покажува големоалбанскиот шовинизам и нивните аспирации во оваа држава“.
Демант на министерката за култура
Министерката за култура Ирена Стефоска демантираше дека Министерството за култура го поддржало гостувањето на наведениот ансамбл да ја претставува Северна Македонија на меѓународен фестивал во Турција: „Лажна е веста што се шири на социјалните мрежи дека Министерството за култура го поддржало гостувањето на наведениот ансамбл да ја претставува Северна Македонија на меѓународен фестивал во Турција. Вистината е дека ансамблот конкурираше за овој настан на Годишниот конкурс, но Комисијата за меѓународна дејност не го поддржа…“.
И во коментарите под објавата на министерката за култура беа забележливи пораки против „предавници“ што ширеа етничка нетрпеливост и дезинформации дека културата на етничките заедниците во Македонија била култура на други држави.
Ќе се разбуди ли обвинителството?
Министерството за култура со години издвојува средства за меѓународна дејност – фолклорна дејност, и на индивидуи и на здруженија на граѓани. Од увидот во таквите програми во последниве 10 години може да се извлече заклучок дека е редовна практика Министерството за култура да поддржува учество на меѓународни фолклорни фестивали на фолклорни ансамбли.
На пример, и во 2015 повеќе албански фолклорни ансамбли биле поддржани на фестивали во Турција и Полска, но била поддржана и „Српската заедница во Македонија“ на учество на Интернационалниот фестивал „Драгачевска труба“ во Гуча, Србија (Годишна програма 2015). И претходно, повеќе албански фолклорни ансамбли биле подржани за учество на фестивали во Турција, Северен Кипар, Албанија, Косово, Италија и во други држави, како што биле подржани и други фолкорни ансамбли на други етнички заедници кои ја претставувале државата на други меѓународни фестивали. И последнава деценија во политичкиот и медиумскиот простор не е забележан ваков обид за поттикнување меѓуетничка нетрпеливост и омраза, и доведување под прашање на востановената практика на Министерството за култура да поддржува учество на меѓународни фолклорни фестивали на ансамбли кои ја промовираат фолклорната разноликост во Македонија.
Фактот што активисти на „Левица“ шират дезинформации во врска со самостојно гостување на „албанска танцувачка група“ на меѓународен фестивал во Турција во октомври 2021 (кое воопшто не било поддржано од Министерството за култура), укажува дека станува збор за намерно ширење дезинформации, со цел да се поттикне нетрпеливост и омраза врз етничка и политичка основа.
Дали конечно ќе се разбуди и заспаното обвинителство и ќе покрене постапка за „предизвикување омраза, раздор или нетрпеливост врз национална, расна, верска и друга дискриминаторска основа“ од страна на активисти на партијата „Левица“?