Државната изборна комисија (ДИК) на 147. седница донесе одлука за поништување на потврдената листа на советници за Град Скопје поднесена од Движењето за национално единство на Турците (ДНЕТ), откако добила информација дека на листата се наоѓа починато лице. Претседателот на ДИК, Борис Кондарко, изјави дека гласовите за оваа листа ќе се сметаат за неважечки, а случајот ќе биде проследен до Јавното обвинителство.
Од ДНЕТ, пак, за ЦИВИЛ изјавија за оваа одлука на ДИК дознале од медиумите.
„Нашиот претседател, Шефот на изборниот штаб и носителот на листата веднаш побараа состанок со ДИК, но бидејќи претседателот и членовите не беа присутни, разговаравме со секретарот, кој најави дека ќе бидеме известени во законскиот рок,“ изјавија од ДНЕТ за ЦИВИЛ.
Во изјавата за ЦИВИЛ, од ДНЕТ информираат дека Општинската изборна комисија на Град Скопје претходно утврдила дека листата е без недостатоци и дека токму државните институции се одговорни за техничките проверки.
„Веруваме дека оваа ситуација е намерна и ќе ги преземеме сите правни чекори,“ рече претседателот на партијата Ердоган Сарач, додавајќи дека за случајот биле информирани претставниците на ОБСЕ/ОДИХР, Полона Зајец и Јулија Манчин.
Наспроти тоа што нивната листа е поништена, а ДИК соопшти дека гласовите за оваа листа ќе бидат сметани за неважечки, од партијата порачуваат дека остануваат во трката.
„Според одлуката донесена од Општинската изборна комисија на Град Скопје, во нашата изборна листа нема никакви недостатоци. Исто така, државните институции се одговорни за отстранување на можни технички пропусти“, инсистираат од ДНЕТ.
Одлуката на ДИК беше доставена до ДНЕТ дури по 19 часот. Мониторинг тимот на ЦИВИЛ ја доби на увид одлуката од ДИК.
„Државната изборна комисија, постапувајќи по службена должност, потврдената листа за членови на совет на Град Скопје од подносител политичка партија Движење за Национално Единство на Турците – ДНЕТ, со решение бр.11-132/3 од 23.09.2025 година донесено од страна на Град Скопје од страна на Изборната комисија на Град Скопје, ЈА ПОНИШТУВА“, пишува во одлуката на ДИК.
Понатаму, во одлуката се вели дека дадените гласови за поништена листа за членови на совет на Град Скопје за политичка партија Движење за Национално Единство на Турците – ДНЕТ, членовите на избирачките одбори ќе ги евидентираат како неважечки гласачки ливчиња во записниците за гласање.
Освен тоа што пишува дека „оваа одлука влегува во сила со денот на нејзиното донесување“, во документот од ДИК нема правна поука.
„Ќе ги преземеме сите потребни правни чекори. Со ваквата скандалозна одлука, како Движење за национално единство на Турците, бараме оставка од Општинската изборна комисија на Град Скопје и бараме од Државната изборна комисија да ги одложи изборите за 14 дена и да ја исправи оваа неправда“, побараа од ДНЕТ.
ЦИВИЛ нотира дека временскиот момент на одлуката на ДИК може да предизвика загриженост во однос на навременото остварување на правото на ефективен правен лек и еднаквиот третман на учесниците во изборниот процес.
Подготви: Мониторинг тимот на ЦИВИЛ
