Со Благица Димитровска, од Здружение за промоција и развој на инклузивно општество „Инклузива“, Куманово, ЦИВИЛ Медиа разговараше за нивните активности за време на локалните избори во 2017 година.
Димитровска зборуваше и за соработката и резултатите од истата со Државната изборна комисија, како и за следните чекори на организацијата за подобрување на уловите и статусот во општеството на лицата со попреченост.
Она на што организацијата посвети внимание беше остварување на гласачкото право на лицата со попреченост.
„Работевме со институциите, но и истражувавме на терен. Имавме свои набљудувачи во ЦИВИЛ. За првпат нашата организација имаше директни информации на денот гласање. Добивавме веродостојни податоци од набљудувачи кои беа родители на лица со попреченост или пак, самите беа лица со попреченост. Тие можеа да проценат дали новините што се воведоа на денот на гласање на локалните избори се во ред или треба уште да се работи. Една од забелешки беше дека Општиниските изборни комисии и Избирачките одбори не се обучени за начинот на комуникација со оваа категорија на граѓани и затоа лицата со попреченост многу малку го остваруваа своето право“, изјави Димитровска, која истакна дека подготвуваат прирачник за комуникација со лица со попреченост наменет за ОИК и ДИК.
Следните чекори на „Инклузива“ се во насока на обучување на ОИК и ДИК, кои на следните избори ќе можат да им помогнат на оваа категорија на граѓани во остварување на нивното гласачко право, но и лицата со попреченост да го зголемат своето учество во политичките и изборните процеси.
„Сакаме да одржиме обуки на ОИК низ цела Македонија. Во моментот сме спречени поради турбуленциите во ДИК. Но, се обидуваме да најдеме начин со кого да комуницираме за да можеме непречено да ги одржиме обуките“, рече Димитровска.
„Инклузива“ во моментот е активна во Североисточниот регион и работат на пристапот до јавни информации на лицата со попречеост.
Биљана Јордановска
Камера: Дехран Муратов
