Европската комисија донесе одлука да одобри дополнителни 50 милиони евра помош како одговор на „катастрофалната хуманитарна ситуација во Газа и за справување со растечките хуманитарни потреби на Западниот Брег“.
Со ова, како што соопшти Еврокомисијата, вкупната итна хуманитарна помош на ЕУ за Газа и Западниот Брег, вклучувајќи го и Источен Ерусалим, годинава достигна 220 милиони евра, а од 2023 година – над 550 милиони евра.
– Првпат во историјата е потврден глад во Појасот Газа, а масовното присилно раселување предизвикано од тековната воена офанзива во градот Газа ги прави семејствата очајни за храна, сместување, здравствена грижа и заштита. На окупираниот Западен Брег, континуираното присилно раселување, строгите ограничувања на движењето и насилството на доселениците доведуваат до акутни хуманитарни потреби за заштита, сместување и пристап до основни услуги, се вели во соопштението.
По повод одлуката на ЕК, еврокомесарката за еднаквост, подготвеност и справување со кризи Хаџи Лабиб изјави дека тоа е дополнителен одговор на Европската Унија на гладот кој сега е реалност во Газа и на неподнослива хуманитарната ситуација.
– Но, самото финансирање не е доволно. Цивилите мора да бидат заштитени, мора да биде загарантиран пристапот до хуманитарна помош и сите страни мора да го почитуваат меѓународното хуманитарно право. ЕУ ќе продолжи да работи со своите партнери за да инсистира на исполнување на овие обврски и на политичко решение што ќе го прекине страдањето, порача Лабиб.
ЕК посочува дека интензивираните израелски напади, тековните копнени судири и наредбите за присилно раселување на цивилите резултирале со тоа над 1,9 милиони луѓе или над 90 отсто од жителите на Газа да бидат насилно раселени низ Појасот.
Дополнително, по месеци жесток конфликт над половина милион луѓе во Појасот Газа живеат во катастрофални услови, а уште 1,07 милиони или 54 проценти од вкупното население се соочуваат со вонредна или кризна ситуација. Комисијата потсетува дека на 22 август 2025 година во Газа и официјално е потврдено постоењето на глад.
– Хуманитарната ситуација продолжува значително да се влошува и на Западниот Брег, меѓу другото и поради брзото ширење на (еврејските доселенички) населби и нивната легализација, што го зголемува ризикот од де факто анексија, наведува ЕК.
Според Комисијата, поради израелските воени операции и најмалку 2.300 напади на еврејските доселеници врз палестинските заедници на Западниот Брег од 1 јануари 2024 година, своите домови ги напуштиле речиси 40.000 лица, пренесе МИА.
