Независната кандидатка за градоначалничка, поранешната претседателка на ДКСК, Билјана Ивановска на својот Фејсбук профил објави дека добила кривична пријава и обвини за притисок од власта.
„Синоќа во 20:30ч двајца полицајци ме побарале да ми врачат кривична пријава, но јас не бев дома. Утринава веднаш појдов да ја подигнам Поканата од ОЈО Скопје за да видам за што станува збор. Ме повикуваат на разговор на 19 август. Јас немам што да кријам, имам чиста совест и не се плашам од никакви закани и ниски удари и притисоци. Мојата цел е достоинствен живот во Центар и нашата битка заедно со „Независни заедно“ е отпор против воспоставените антивредности на коруцпија и клиентелизам кои нè доведоа до оваа ситуација’, напиша Ивановска.
Ивановска ќе се кандидира за градоначалничка на Општина Центар, како независен кандидат на „Независни заедно“. На вчерашната прес конференција таа изјави дека досегашната состојба во Центар е резултат на многу корумпирани и лукративни политики кои го занемарија интересот на граѓаните.
Б. Ј.
