Аљуш Еминов, човек без сопствен дом, се охрабри јавно да зборува за проблемите со кои со години се соочува, здобивајќи се со општествениот статус, бездомник.
На панел – дискусијата „Кој ги тркала Ромите?“ во организација на ЦИВИЛ, Еминов изјави дека проблемот не е вчерашен или од пред две години, туку трае повеќе од 20 години независно од тоа кој е на власт.
„Две години сме на едно место, една локација, но проблемот постои повеќе од 27 години. Има над 150 семејства што се преместуваат на различни локации низ различни градови. Проблемот не е решен затоа што самата држава не ги гледа како народ. Ветувањата се многу големи од година в година, сите се надеваат на нешто подобро, меѓутоа секогаш се случува истото. Имавме една мала надеж кога пред да дојде на власт, сегашната министерка за труд и социјална политика, лично на мене ми вети дека работите ќе тргнат на подобро, дека луѓето не смеат да живеат така и дека ќе бидат вдомени. Меѓутоа постапувањето на новата власт во овие последни денови е обично копи пејст на претходната власт“, изјави Еминов објаснувајќи ги случувањата со отстранување на диво поставената населба во „Урбан парк“ во Скопје.
Еминов истакна дека постои обид за манипулација, но ако власта може да изманипулира 7 семејства, не може со сите, затоа што, за жал, многу семејства се во прашање.
„Ветија локација во Визбегово со тврда градба бараки за бездомните семејства, со струја, вода, канализација… Меѓутоа сместени се во домови за деца без родители. Условите и таму не се најсјајни. Во изминатите неколку месеци луѓето во неколку наврати бегаа од домовите… Но, интересен факт е што и во домовите не сакаат да ги примат овие луѓе. Тие биле во социјално и отаму ги упатиле кај Кале, таму да живеат 5 години за да можат се сместат во дом, како што е „Ранка Милановиќ“… Згрижувањето е месец, два додека не се разбегаат…“, изјави Еминов.
Еминов рече дека главното прашање што треба да се постави е зошто е потребно 5 години да се живее под Кале…
„Тие луѓе се 27 години на различни локации.. бездомник е бездомник без разлика дали живеел кај Стара Железничка, Автокоманда или под Кале“, заклучи Еминов.
Панел-дискусијата ги предизвика и претставниците на граѓанските огранизации што се борат за правата на Ромите да се вклучат и да ги прикажат предизвиците со кои се соочуваат од нивен аспект.
Биљана Јордановска
Камера: Атанас Петровски