Деветтиот круг санкции на ЕУ против Москва ќе ги погоди про – воените руски медиуми виновни за „сериозно искривување и манипулирање со фактите“, како и популарни ТВ водители и писатели кои „западот и Украина ги поврзуваат со безбожност и ѓавол“, објави онлајн весникот ЕУобсервер .
Дозволата за емитување на три руски ТВ канали – НТВ/НТВ Мир, Росија 1 и РЕН ТВ – треба да биде одземена, додека 144 лица, меѓу кои и ТВ водителките Борис Корчевников и Марина Ким, треба да се појават на новата црна листа на ЕУ, вели ЕУобсервер.
Меѓу поединците вклучени во нацрт-црната листа на ЕУ беше Сергеј Михеев, кој ја промовираше антиукраинската пропаганда на Кремљ.
Претседателката на Европската комисија Урсула фон дер Лајен на 7 декември, кога ги откри деталите за деветите нацрт-санкции на ЕУ, рече дека ќе ја таргетира „руската пропагандна машина со отстранување на четири дополнителни канали од етерот и сите други дистрибутивни платформи“. Таа не даде повеќе детали.
Официјалниот претставник на ЕУ тогаш рече дека предложената листа за санкции е проширена за „речиси 200 поединци и ентитети“, која ќе ги вклучи руските вооружени сили, индивидуални офицери и одбранбени компании, како и политички партии и министри.
„Две ќерки и една братучетка на чеченскиот воен лидер Рамзан Кадиров“ се исто така меѓу целите, пренесува ЕУобсервер.
Министерот за надворешни работи, Дмитро Кулеба, минатата недела ја повика ЕУ да „воведе строги санкции врз руското ракетно производство и се што се користи за лансирање смртоносни ракети кон Украина.
„Онлајн весникот, сепак, рече дека нацртот може да се прилагоди со министрите за надворешни работи на ЕУ поради одржување на разговори на 12 декември.
Како што пренее Би-би-си, на 3 декември, по неколкумесечни преговори на западните сојузници, земјите-членки на ЕУ постигнаа договор за ограничување на цената на руската нафта на 60 долари за барел. Кон ваквото ограничување се приклучија и земјите од Г-7, како и Австралија. САД сметаат дека новото ограничување на цената на руската нафта веднаш ќе го намали најважниот извор на приходи на Путин што ги користи за војната во Украина.
ЕУ го одобри својот осми пакет санкции на 5 октомври, по што беа воведени нови трговски ограничувања за да се ограничат приходите на Русија за финансирање на војната против Украина. Главен фокус на овој пакет е ограничувањето на трговијата со руска нафта за трети земји, надвор од ЕУ.
подготви: Д. Мишев
