Популарната улица Бурбон стрит во Њу Орлеанс повторно беше отворена вчера, еден ден откако ветеран на американската армија удри со пикап во толпа на новогодишна веселба, убивајќи најмалку 14 луѓе.
Луѓето претпазливо се враќаа во Францускиот кварт, бендовите во живо продолжија да свират на нивните вообичаени ќошиња, а ожалостените застанаа покрај импровизираниот споменик украсен со цвеќиња и мониста од Марди Гра, пренесува ЊуЈорк Тајмс.
Инспекторите вчера соопштија дека напаѓачот Шамсуд-Дин Бахар Џабар дејствувал сам. Џабар, кој загина во престрелка со полицијата, во видеото што го објави на интернет изјави дека се приклучил на групата Исламска држава.
„Тој беше 100 проценти инспириран од ИСИС“, рече на прес-конференција Кристофер Раја, официјален претставник на одделот за борба против тероризмот на ФБИ.
„Уверени сме, во овој момент, дека нема соучесници“, рече Раја.
Властите соопштија дека направиле стотици интервјуа и прегледи на повиците на напаѓачот, сметките на социјалните мрежи и електронските уреди.
ФБИ не најде дефинитивна врска помеѓу нападот во Њу Орлеанс и експлозијата на камионот Тесла пред хотелот Трамп во Лас Вегас, но истражителите не исклучуваат ништо. Возачот во Лас Вегас си пукал во глава непосредно пред експлозијата, во која се повредени седум лица.
Драган Мишев
