Франција денеска (22 март) го одржува вториот круг од локалните избори, со кои се избираат општински и заеднички советници во околу 35.000 општини низ земјата. Изборниот процес се одвива во два круга, при што вториот круг се организира во оние општини каде што ниту една листа не освоила апсолутно мнозинство во првиот круг одржан на 15 март.
Овие избори имаат силно политичко значење и на национално ниво.
Првиот круг откри неколку клучни трендови. Крајната десница, предводена од Националниот собир (RN), и радикалната левица (La France Insoumise) остварија значајни резултати, што укажува на зголемена политичка поларизација пред претседателските избори во 2027 година, анализира Le Monde.
Во најголем дел од општините резултатите веќе беа решени во првиот круг, но големите градови како Париз, Марсеј и Лион остануваат клучни боишта во вториот круг, објави AP News.
Особено внимание привлекува трката во Париз, каде што кандидатот на социјалистите Емануел Грегоар освои околу 38% од гласовите во првиот круг, пред кандидатката на десницата Рашида Дати со околу 25%. Исходот во главниот град ќе зависи од политичките договори и прелевањето на гласови меѓу различните блокови.
Изборите се одржуваат и во услови на нови правила, воведени со реформите од 2025 година, кои го стандардизираат пропорционалниот систем во помалите општини и ги менуваат изборните процедури во Париз, Лион и Марсеј.
Интересен феномен е и таканаречениот „замор на градоначалниците“. Голем број актуелни локални лидери одлучија да не се кандидираат повторно, наведувајќи ги како причини преголемиот работен товар, ниските примања и зголемениот притисок, па дури и агресија кон избрани функционери.
Во комбинација со релативно ниската излезност и растечката недоверба во политиката, овие избори претставуваат важен сигнал за состојбата на француската демократија и потенцијалните насоки на политичките промени во пресрет на 2027 година, пишува Le Monde.
Резултатите од првиот круг, а и динамиката во пресрет на вториот изборен круг на локалните избори во Франција, покажуваат сериозни промени во политичкиот мозаик на една од најмоќните држави во Европа. Пред сѐ, анализите покажуваат дека политичката поларизација станува новата нормалност, како и тоа дека земјата се оддалечува од центристичкиот модел на актуелниот претседател Емануел Макрон и се движи кон конфронтација меѓу спротивставени блокови.
ЦМ Деск
