Амбасадорот Виктор Габер, дипломат од кариера, по соопштението на Дипломатскиот клуб во кое се изразува загриженост затоа што „во прашање се доведени партнерските односи на Македонија со ЕУ, воспоставени со Спогодбата за стабилизација и асоцијација, кандидатскиот статус на Македонија, визната либерализација, сѐ дури и до губење на препораката за почеток на преговорите за влез на Македонија во ЕУ“, зборува за ЦИВИЛ Медиа за политичката криза, за состојбите во македонската дипломатија, за однесувањето на претседателот Иванов и за загрозената позиција на Македонија на меѓународната сцена…
Во однос на загрозената позиција на Македонија на меѓународната сцена, Габер вели дека се води политика која нé оддалечува од нашите стратешки цели, односно интеграција на Македонија во Европската унија и НАТО.
За настапите и постапките на Ѓорге Иванов, неговото избегнување на средбата со Јоханес Хан и за изјавите на Доналд Туск, Габер е дециден дека тие не одат во прилог на подобрување на позицијата на Македонија на меѓународната сцена.
„Постапката на Иванов е недржавничка постапка којашто на Македонија не ѝ обезбедува авторитет во рамките на она што го претставува Европската унија, што претставува напредок на земјата во интегративниот процес, бидејќи сакаме да одиме напред, а не се среќаваме со тој што е најодговорен, и тоа не се среќава тој што е претседател?! Што се однесува до Туск, таму има две непријатни работи. Првата е кога вели дека треба пристојно и со здрав разум да се пријде во решавањето на проблемите! Кризата значи дека одредени демократски процеси кај нас стагнираат, и тоа светот го гледа. И втората е кога вели дека повеќе нема да нѝпружаат никаква помош, додека самите не се договориме“, одговори Габер на прашањетона ЦИВИЛ Медиа.
За ситуацијата во македонската дипломатија Габер констатира дека е очајна и во кадровска и во материјална смисла.
„Во нашето општество кон дипломатијата не се гледа како една државно одговорна, па и софистицирана, државна дејност, туку се гледа како на вработување на кадри коишто се блиски до одредени структури кои денеска имаат одлучувачко влијание во општеството“, вели амбасадорот.
За тоа дали постои „план Б“ во македонската дипломатија, Габер е дециден дека во надворешните работи секогаш мора да постојат алтернативи, а во однос на предлозите за излез од очајната ситуација, тој потенцираше: „Препораките на Дипломатскиот клуб се дека стратешките цели мора да се бранат. А стратешките цели се знаат. Ако веќе Собранието, уште од 1993 година, рекло дека одиме кон НАТО, односно кон Европската унија, тогаш немаме други препораки, освен да се работи и да се истрае на овие концепти коишто се од битно значење“, изјави Габер.
Маја Ивановска
Камера: Дехран Муратов