Изјавите на хрватскиот лобист Макс Приморац на расправата пред Комитетот за надворешни работи на Претставничкиот дом на САД повторно го отворија прашањето за растечкиот христијански екстремизам и неговата улога во ширењето на антимуслимански наративи. Приморац ја опиша Босна и Херцеговина како „пропадната држава“, тврдејќи дека Хрватите трпат дискриминација и дека е потребно создавање „трет ентитет“, како и укинување на Канцеларијата на високиот претставник, пишува Geopol.ba.
Овие позиции, како што истакнуваат од Geopol, кои не се засновани на факти, ја поедноставуваат комплексната политичка и општествена состојба во земјата и ја продлабочуваат етничката поларизација. Во Европа веќе е забележливо ширење десничарски трендови и реторика која ја нормализира исламофобијата, што во контекст на Босна и Херцеговина може да биде искористено како инструмент за притисок врз Бошњаците и оправдување на политички проекти базирани на етнички поделби.
Оттаму наведуваат дека „историското и државното наследство на Босна и Херцеговина јасно сведочи за континуитетот на мултиетничкиот и мултирелигискиот живот – од средновековните државни формации, преку периодите на Отоманската империја и Австро-Унгарија, до рамноправната република во поранешна Југославија и современата независна држава. Во оваа традиција се втемелува и почитувањето на различностите, што го потврдува и односот на бошњачката заедница: во Сараево се наоѓаат бисти на папата Јован Павле Втори и Мајка Тереза, а за време на војната христијанските верски објекти не биле цел на уништување, за разлика од стотиците разрушени џамии од страна на српските и хрватските вооружени формации“.
„Тврдењата кои Приморац, Зовко и други хрватски политички актери ги пласираат за радикализација на муслиманите и „загрозеност“ на Хрватите не одговараат на фактичката состојба и реално им наштетуваат и на институциите и на самите Хрвати во земјата, претставувајќи ги како политички маргинализирана заедница иако тие имаат значајна улога во управувањето и процесите на одлучување. Регионалната стабилност не може да се изгради врз еднострани решенија, ниту преку етнички инженеринг. Неопходна е соработка меѓу сите заедници, институционална кохезија и поддршка од меѓународните партнери. Потребно е одлучно отфрлање на секој обид за политичко манипулирање со етничките тензии и наративите кои легитимираат поделби и дискриминација“, истакнуваат од Geopol.
Центарот за геополитички истражувања GEOPOL повикува на одговорност и прекин на кампањите што создаваат притисок врз Бошњаците со цел да се релативизира нивната политичка улога. Клучните одлуки во државата можат да се носат само низ дијалог и рамноправно учество, а евроатлантскиот пат на Босна и Херцеговина е заеднички интерес кој ги обединува сите граѓани.
