Повеќе медиуми објавија две изјави од партискиот прес на Владимир Ѓорчев од 8 јануари 2022 во врска со пандемијата од ковид 19, без да извршат проверка на фактите.
Во првата изјава поранешниот пратеник Ѓорчев тврди дека „Македонија има најголема смртност во регионот“. Но, во моментот кога Ѓорчев ја дава изјавата Северна Македонија беше на 5 место во Европа по број на смртни случаи од ковид 19 на 1 милион население. Повеќе смртни случаи имаа и Унгарија а во регионот повеќе смртни случаи на 1 милион население имаа Црна Гора, Босна и Херцеговина и Бугарија.
Иако Ѓорчев не го прецизира регионот, три земји од поблискиот регион (Бугарија, БИХ и Црна Гора) имаа поголема смртност од земјава, па оттаму може да заклучиме дека тврдењето дека „Македонија има најголема смртност во регионот“ – не е поткрепено со факти.
И второто тврдење на Ѓорчев дека „Македонија беше последната земја во Европа која што доби вакцини“.која исто така ја пренесоа повеќе медиуми, не ја поминува проверката на фактите.
На страницата https://covidvax.live/ можат да се најдат и податоци колку вакцини се администрирани на кој датум за секоја земја во Европа. Проверката покажува дека вакцинацијата барем во неколку европски земји започнува по администрирањето на првите вакцини во Македонија – и тоа, во Косово, Молдавија, Украина и во Црна Гора. Според овие податоци, вакцинацијата во Косово започна на 29 март 2020, во Молдавија на 2 март 2020, во Украина на 24 февруари 2020, во Црна Гора на 21 февруари 2020, додека во Северна Македонија на 17 февруари 2020.
Накусо, и Ѓорчев, а и сите медиуми кои ги објавија неговите изјави без да ги проверат фактите, останаа со „кратки нозе“.
Да потсетиме, обврска на медиумите е да ги проверат изјавите на политичарите кои се изнесуваат вакви тврдења, и на публиката да и ја соопштат вистината. Затоа што, доколку не го направат тоа, стануваат мегафони на политиката, а не медиуми кои работат за јавниот интерес и публиката.
Автор и водител: Петрит Сарачини
Камера и монтажа: Ариан Мехмети
Стручен соработник на сценарио: Жарко Трајаноски
