Порталот на албански јазик Шќипмедија, објави лажна вест дека косовската групација „Вива фреш“ наводно ќе го купува македонскиот трговски синџир „Тинекс“, а експресно истата лажна информација ја објавија повеќе македонски медиуми.
Веста ја демантираа и од „Тинекс“ и од „Вива фреш“.
„По објавената вест на порталот Shqipmedia на 20.9.2022 со наслов дека е постигнат договор за купопродажба на ланецот супермаркети Тинекс од страна на компанијата Вива фреш, вест која ја пренесоа многу македонски портали без да нè прашаат да ја потврдиме или демантираме веста создадоа збунувачка атмосфера во јавноста, меѓу вработените и соработниците. Компанијата Тинекс-МТ ДООЕЛ Скопје ја информира јавноста дека ниту Тинекс маркетите, ниту компанијата е во преговори со потенцијални купувачи а уште повеќе дека дошло и до договор за купопродажба. Тинекс-МТ ДООЕЛ Скопје кој управува со Тинекс маркетите и понатаму останува со единствениот сопственик Владимир Тодоровиќ“, соопштија од македонската компанија.
Лажната вест ги разгори страстите на националистите и оркестрирано почнаа да шират говор на омраза кон косовските Албанци и кон Владата.
Меѓу тие што ја проширија оваа лажна вест е и секретарката на опозициската партија Левица, Јована Мојсоска која пишала коментар „Северна е омилена дестинација на косоварскиот црн кеш“.
Еден од тие што ја искористија лажната вест за да шират антивладина политика е и Цветин Чилиманов кој коментарира: „Никој не е должен да седи во Северна, да го рекетираат Муртинци“, при споделување на статусот на Капетански Дневник (познат бот на Левица).
Лажната вест поттикна говор на омраза, но веројатно како и до сега, овие лица ќе останат неказнети!
Покрај лажните вести и говорот на омраза, овие партиски ботови (ликови) не пропуштаат ниту една прилика да шират руска пропаганда. Само партиски ботови кои функционираат под команда на одредени центри на моќ може да вметнат „руски амбасадор (спасител)“, „Самсоненко“, „е*****т НАТО“, во лажна вест која е поврзана со „Вива фреш“ и „Тинекс“.
Оваа лажна вест за среќа е брзо демантирана и разобличена. Но, дали надлежните институции ќе ја продолжат праксата на неказнивост или конечно ќе почнат да ги санкционираат сите кои шират лажни вести, дезинформации, говор на омраза…, останува да видиме.
ЦМТ