Стотина граѓани денеска по вторпат протестираат пред Основното јавно обвинителство во Скопје барајќи правда за починатиот, познат во јавноста, малиот Алмир.
Пред месец дена се собравме пред ова Обвинителство со барање:
- обвинителите како носители на функции, стручно и совесно да ја вршат нивната функција и да одлучат како што предвидува правото и правдата;
- побаравме да запре селективнатата правда;
- побаравме правото конечно да профункционира во Република Македонија.
За жал, ние продолжуваме да сме сведоци на пристрасно, непрофесионално и неправедно судство. Наместо да сме сведоци на окончување на случајот „Алмир“ со заслужена казна за сторилетот на делото: УБИСТВО СО УМИСЛА, ние сме сведоци на огласи за продавање на ОРУЖЈЕТО со кое беше усмртен четиригодишниот Алмир.
Случајот Алмир е класичен пример како НЕ СМЕЕ да постапува еден судски систем и една држава која во својот Устав го гарантира правото на живот. Пропустите направени во истражната постапка, се иницијалната каписла во оваа судска голгота на семејството Алиу и на правдата во Македонија.
Основното Обвинителство Куманово наместо да го конфискува возилото, кое служело како оружје во грозоморното убиство на Алмир, истото го вратиле на семејството на обвинетиот. Поради ваквата истражна постaпка; уништување на доказите, односно на оружјето со коешто е извршено делото; пристрастноста на Јавниот обвинител при водењето на постапката; „шетањето“ на квалификацијата на делото од основото кон вишото и републичкото обвинителство, односно ПОРАДИ САБОТАЖА НА ПРАВДАТА во случајот Алмир, бараме изземање на Јавниот Обвинител од Основното Обвинителство – Куманово, Сузана Кусигерска.
Водејќи се од досегашната постапка во случајот Алмир, убедени сме дека судството во Македонија повторно ќе падне на испитот на правдата . Овој пат, испит врз животот на едно 4 годишно ангелче.
Затоа се собравме денес овде, да не го дозволиме тоа. Се собравме да застанеме на страната на правдата и да побараме од судските органи на Република Македонија да застанат на иста страна.
Бараме праведно судење за случајот Алмир! Бараме правда!
Ова судство, оваа држава МОРА ДА ДОКАЖАТ ДЕКА ќе го одбранат најзначајното, врвното човеково право – ПРАВОТО НА ЖИВОТ!
ПРАВДА ЗА АЛМИР! ПРАВДА ЗА СИТЕ!
