Асоцијацијата „Женска акција“ во четврток, на 28 септември, во ГЕМ Клубот, организира промоција на студијата „Кон граѓанскиот паноптикон“, за градење на систем во кој транспарентноста создава отчетност на носителите на власта кон граѓаните.
На настанот ќе се обратат министерот за информатичко општество и администрација, Дамјан Манчевски и директорката на Институтот за европска политика, Симонида Кацарска.
„’Бомбите’ од 2015, укажаа на нелегално следење на електронските комуникации на политичките и бизнис елити, на медиумите и на граѓанските активисти, во периодот од 2008 до 2015 година. Тоа беше втор пат, по аферата ‘Големото уво’ од 2000 година, да се открие нелегално масовно прислушување што ја нарушило приватноста и слободата на изразување. Имајќи ги предвид детектираните предизвици, предлагаме низа реформи кои ќе овозможат наместо паноптикон – систем во кои граѓаните се исплашени, бидејќи се под постојан надзор од власта – во Македонија да се изгради граѓански паноптикон – систем во кој транспарентноста создава отчетност на носителите на власта кон граѓаните. Студијата содржи препораки за подобрување на правната и надзорната рамка врз основа на правото на ЕУ и најдобри практики од членките на Унијата, а во насока на ограничување на ризиците од нелегитимно следење на електронските комуникации“, стои во поканата на асоцијацијата „Женска Акција“.
Проектот „И мета-податоците се лични! Како до подобра рамнотежа меѓу приватноста и потребата за следењето на комуникациите?“ го спроведува Асоцијацијата „Женска Акција“, поддржан од Европската унија, преку проектот „Мрежа 23+“, а имплементиран од Институтот за европска политика и од Хелсиншкиот комитет на Република Македонија.