За градоначалникот на Штип, Иван Јорданов, нема дилеми дека треба целосно да се поддржат активностите поврзани со мултикултурата и европските вредности, став кој беше недвосмислено изнесен на средбата со претставниците на ЦИВИЛ, кои му го претставија проектот „Заедно за подобра иднина“ во чии рамки заеднички ќе спроведат најмалку две активности во Штип до крајот на годината.
„Го подджувам секој чекор за соработка во насока на развојот на мултикултурата и европските вредности“, рече Јорданов за време на средбата, „Од прва ми се допаднаа идеите на проектот.“
Како што е вообичаено, по средбата, ЦИВИЛ објави кратка изјава во живо на социјалните мрежи.
„Денеска во Штип, ЦИВИЛ беше на средба со градоначалникот Иван Јорданов, на која разговаравме за заеднички активности во рамките на проектот ‘Заедно за подобра иднина’, со поддршка од Министерството за надворешни работи на Големото Војводство Луксембург“, изјави Претседателот на ЦИВИЛ, Џабир Дерала веднаш по завршувањето на средбата.
Дерала информираше дека со Јорданов се зборуваше за заедничко организирање на настан „Граѓански дијалози за предизвиците и перспективите на мултикултурализмот и европските вредности на локално и национално ниво“, на кој ќе се дискутира за мултикултуралимот и европските вредности, како и за распишување награден конкурс за ликовни творби во основните училишта во Штип, на темите поврзани со проектот. „Граѓанските дијалози“ се очекува да се одржат до крајот на првата половина, додека конкурсот и доделувањето на наградите се предвидени за втората половина од оваа година.
„Во втората половина на оваа година во Штип ќе се распише конкурс за ликовни творби за учениците од основните училишта кои ќе творат на тема мултукултура. Со покровителство на Општината ќе формираме и награден фонд за учесниците на конкурсот“, објасни Дерала во изјавата во живо, по средбата со градоначалникот Јорданов.
Средбата со градоначалникот на Штип, како и онаа во Куманово, се дел од серијата средби на ЦИВИЛ со градоначалници.
На јавниот настан „Граѓански дијалози“ ќе бидат поканети и претставнички и претставници на локалните институции на власта, бизнис заедницата, образовните установи, граѓанските организации и други форми на граѓанско здружување, етнички и верски заедници и други лидери во заедниците.
Б. Јордановска
