ГРАЃАНСКИ ФОРУМ (РЕАКЦИИ): „Да направат мал чекор да бидеме поблиску до ЕУ“; „Одете си, а попат погледнете ги цените во маркетите“; „Да се возат со јавен превоз и да работат за минимална плата“…

Секој петок, во утринските часови граѓанките и граѓаните го препознаваат слободниот простор на ЦивилМедиа во „Граѓанскиот форум“ – како завршница на прашањата на денот,  и без задршки имаат можност преку коментари да испратат пораки, искуства но и критики до властите, институциите, политичарите, а според  досегашните одговори, тие тоа го прават на јасно артикулиран начин, со директни пораки и сугестии.

Целта на петочниот Граѓански форум на ЦИВИЛ е да им се обезбеди на граѓанките и граѓаните безбеден  и слободен простор ( каков што впрочем  со години е ЦИВИЛ) во кој тие  ги изразуваат своите грижи, споделуваат искуства и им порачуваат на властите каде можат да се поправат, каде им се грешките, да прашаат за решенија на евентуални горливи проблеми, а во исто време тие пораки и сугестии да бидат јавни, и неподложни на цензура или прикривање.

ГРАЃАНСКИ ФОРУМ ( ПРАШАЊЕ НА ДЕНОТ): Што сакате да им порачате на властите?

Што им порачаа граѓанките и граѓаните на властите минатиот петок?

Една од најчестите пораки од граѓаните е оваа власт да си замине, не изостана ниту минатиот петок.

• Да си одат од власта што побрзо. Да престанат да не шетаат по тавани!
• По стоти пат. Да си ги земат куферите и да си одат.

Додека си одат, да ги погледнат цените во маркетите, порачуваат граѓаните меѓу другото, истакнувајќи ја јасно економската состојба на земјава, која е на работ на сиромаштија додека власта постојано се фали со нови милиони евра ( позајмени), со кои според нив, ќе се подобри стандардот, а во меѓувреме им укажува на граѓаните што треба а што не треба да јадат за да имаат повеќе пари!

Граѓаните бараат да почне да функционира правниот систем со затворање на корумпираните, бараат да му се даде опција на народот и правци за развој, да не се назадуваат започнатите процеси.

• Да се освестат и да мислат на иднината на државата- која е во ЕУ, каде има и контроли за кои се свесни, а придобивките се познати.
• Што побрзо зачленување во ЕУ !!! Само тоа ни е спасот.

Граѓаните јасно порачуваат дека не се слепи, и дека им е јасно зошто се кочи процесот на интеграции во ЕУ – бидејќи со самото членство во европската унија, власта би била под контрола и не би имала одврзани раце во однос на одлуките кои досега се чинат секакви, само не во прилог на граѓаните.

• Да користат градски превоз, да работат за минимална плата и да се види некој аир од нив,

Гласи една од пораките, со што им се посочува на политичарите дека не се свесни како живеат тие, кои што ги гласале.

Ова се само дел од пораките што граѓаните ги оставија на нашата платформа, на Граѓанскиот форум во изминатиот петок, а кои можете да ги прочитате на следниот линк:

Редакцијата на ЦивилМедиа е отворена за граѓанките и граѓаните не само во петок, туку и секој ден од неделата, да споделат свои пораки, прашања, грижи  и искуства, било во коментари или во пораки, и им заблагодарува за довербата, отвореноста и директниот настап. Ве очекуваме секој ден, а во специјализиран простор – секој петок во Граѓанскиот форум.

Сите прашања на денот може да се најдат во рубриката ФОРУМ на интернет весникот ЦивилМедиа.

Д. Т.