Што им порачаа на властите читателите на ЦивилМедиа во пораки на Граѓанскиот форум, во петокот ( 13 јуни)?
Да си одат, да си заминат, да украдат се што ќе можат и да си одат за да почне да функционира државата! Ова се редовните пораки од граѓанките и граѓаните до властите, а кои се повторуваат на секој петочен граѓански форум на ЦивилМедиа.
ГРАЃАНСКИ ФОРУМ (ПРАШАЊЕ НА ДЕНОТ): Што сакате да им порачате на властите?
Граѓаните бараат што побргу да се отвори Уставот, да се внесат Бугарите и да се започнат преговорите за членство во ЕУ, порачуваат дека властите ќе си го добијат одговорот од граѓаните на избори, и прашуваат до кога ќе ја држат заробена државата…
Дел од пораките се однесуваат и на животната средина, односно на нечистотијата што се шири се повеќе од ден на ден. Читателите бараат од функционерите да си ги намалат платите и да си ја работат работата за која ги избрале и ги плаќаат токму граѓаните.
Една од пораките гласи:
Да се свестат дека народот ги бира, но и ги менува.
Очигледно е дека граѓаните не се задоволни од досегашната работа на властите, и тоа јасно го артикулираат на граѓанскиот форум на ЦивилМедиа.
Повеќе работа, помалку сликање, порачуваат тие.
Во мноштвото коментари може да се прочитаат и саркастични пораки, како што гласи следната:
– Да формираат под итно обучен центар за инспектори по економски криминал.
Едноставно…првенствено да не се занесуваат и да лажат а при тоа да не прават мајмуни. Да си ги признаат грешките кои се гледаат од авион, гувернерот на Народна банка да не тропа глупости и да навива за сивата економија кога посочува дека треба та се работат барем 3 работи за да се преживее. Да се одмота конечно после три месеци клопчето околу Кочани и тие што се огрешиле да одговараат без оглед кои се и чии се, гласи една од пораките.
„Граѓански форум“ е простор во кој секој петок, како завршница на прашањата на денот, граѓаните без задршки имаат можност преку коментари да испратат пораки, искуства но и критики до властите, институциите, политичарите, а според досегашните одговори, тие тоа го прават на јасно артикулиран начин, со директни пораки и сугестии.
Редакцијата на ЦивилМедиа е отворена за граѓанките и граѓаните не само во петок, туку и секој ден од неделата, да споделат свои пораки, прашања, грижи и искуства, било во коментари или во пораки, и им заблагодарува за довербата, отвореноста и директниот настап. Ве очекуваме секој ден, а во специјализиран простор – секој петок во Граѓанскиот форум.
Сите прашања на денот може да се најдат во рубриката ФОРУМ на интернет весникот ЦивилМедиа.
Д. Тахири
