„Граѓански форум“ е простор во кој секој петок, како завршница на прашањата на денот, граѓаните без задршки имаат можност преку коментари да испратат пораки, искуства но и критики до властите, институциите, политичарите, а според досегашните одговори, тие тоа го прават на јасно артикулиран начин, со директни пораки и сугестии.
ГРАЃАНСКИ ФОРУМ (ПРАШАЊЕ НА ДЕНОТ): Што сакате да им порачате на властите?
Што им порачаа граѓанките и граѓаните на властите минатиот петок?
- Поништување на законот за зголемување на платите на функционерите од 78%, укинување патни трошоци и апанажа, зголемување на минималната плата до приватниот сектор од каде се полни буџетот, укинување на пресметувањето на струјата со преноси и блокови, намалување на маржите во маркетите – порача еден од граѓаните.
Пораката е повеќеслојна и јасна – додека граѓаните се борат да го поминат месецот, политичарите си ги намножуваат своите привилегии.
- Граѓаните бараат да се преиспита секоја неправилност, распределбата на државниот имот во приватен, платите, апанажите, потекло на имот, унгарскиот кредит, англискиот кредит… Што укажува длабока недоверба во властите.
Не изостанаа ниту редовните пораки „да си одат“, и да не си играат со трпението на добрите луѓе.
Граѓаните, очигледно уморни од постојаните ( празни) ветувања дека државата се грижи за народот, бараат што побрзо членство во ЕУ – или да си одат.
- Да почнат да работат барем нешто за граѓаните, гласи една од пораките.
- Не се избрани да ни кажуваат прикаски
- Лустрација со НАТО стандарди
- Да не прават кадаиф од тенеќе, ни ги скинаа цревата
Ова се само дел од пораките што граѓанките и граѓаните им ги испратија на властите, минатиот петок во коментари на Граѓанскиот форум.
Редакцијата на ЦивилМедиа е отворена за граѓанките и граѓаните не само во петок, туку и секој ден од неделата, да споделат свои пораки, прашања, грижи и искуства, било во коментари или во пораки, и им заблагодарува за довербата, отвореноста и директниот настап. Ве очекуваме секој ден, а во специјализиран простор – секој петок во Граѓанскиот форум.
Сите прашања на денот може да се најдат во рубриката ФОРУМ на интернет весникот ЦивилМедиа.
Д. Т.
