Третиот Форум на цивилното општество, како претходница на Самитот на Западен Балкан, се одржа вчера во Трст, со присуство на околу 200 претставници на граѓанскиот сектор од Македонија, Албанија, Црна Гора, Босна и Херцеговина, Косово и други делови од регионот и од Европа.
На Форумот се зборуваше за демократијата, за креативните индустрии за младите, за енергетиката и климатските промени, за миграциите и за улогата на медиумите.
Говорници на дискусијата беа Јоханес Свобода, претседател на Центарот за демократија и помирување во Југоисточна Европа – Солун, Вук Велебит, студент на Факултетот за политички науки во Белград, Алида Врачиќ, извршна директорка на тинк тенк Популари – Берлин и Милан Живковиќ, раководител на канцеларијата на ФЕС – Скопје.
„Роден во 1993, демократијата ја перцепирам како она што ми се случува сега – а тоа се Вучиќ, Дачиќ и останатите кои се обидуваат да ни приредат некоја паралелна демократија. Важно е да бидеме активни во процесите и да реагираме кога ни е загрозена сеопфатната демократија”, изјави Велебит.
Јоханес Свобода истакна дека е загрижувачки кога некои од граѓаните во земјите од регионот избрале да гласаат за лица кои ја немаат демократијата на својата политичка агенда, но, сепак, и тоа е демократија. „Едукацијата, таа политичката, е многу важна за целиот регион, а истата треба да почне од локалното ниво – и не смее да се прават компромиси“, вели Свобода.
„Не смееме да заборавиме каде беше регионот, а посебно Босна и Херцеговина пред 20 години: се криевме по своите куќи или засолништа, бевме ограничени на своите локални места, а околу нас летаа бомби. Има прогрес и мора да се фокусираме на тоа како да ги подобриме општествата во кои живееме, а тоа да го направиме со поголем оптимизам”, истакна Врачиќ.
Милан Живковиќ, од ФЕС – Скопје, која се јавува како коорганизатор на Форумот, го цитираше самиот Фридрих Еберт, велејќи дека на демократијата и се потребни демократи.
„Ние тоа го прошируваме со тоа што ќе кажеме дека на демократијата и требаат активни, информирани и одговорни граѓани. Активистите треба да сакаат да влезат во политичкиот процес на промени, а граѓанскиот сектор и останатите активисти треба да ги поддржат ако се тие со искрени намери. Социјал-демократијата (исто како и демократијата) не е ‘шведска маса” па да бирате што сакате или што ви одговара: таа е ‘three/five-course-meal’ каде сите се еднакви! Примерот на СДСМ на излегување од рамките на (суштинската) моноетничност во сопствената партија е показател дека тоа е возможно – сега треба да се осигураме дека нема да се третира демократијата како ‘шведска маса’ туку ќе биде пример за едно општество за сите”, истакна Живковиќ.
Форумот завршува денес, кога претставници од цивилниот сектор на шефовите на дипломатиите на шесте земји од Западен Балкан, меѓу кои и на Никола Димитров, ќе им ги предадат препораките. Форумот го организираат Европскиот фонд за Балкан (ЕФБ), Фондацијата Фридрих Еберт и Фондацијата Хајнрих Бел.
Во меѓувреме, заврши шестиот Форум на невладини организации, на кој учествуваше и ЦИВИЛ – Центар за слобода, од каде произлезе Декларација – препораки кои ќе бидат проследени до владите на сите земји од регионот, европските институции, Советот за регионална соработка, Меѓународната организација за труд и Советот на Европа.
