„Некои амбасадори почнаа премногу да се мешаат во внатрешната политика на земјата и тоа мора да запре. Остануваме отворени за соработка, но нема да дозволиме мешање на амбасадори во внатрешно-политичките работи на земјата. Нема да дозволиме аболицираниот криминалец Зоран Заев да формира влада со фалсификат, ВМРО-ДПМНЕ нема да дозволи!“, им порача на демонстрантите во зовриената атмосфера пред Државната изборна комисија, експремиерот Никола Груевски, презентирајќи им го прогласот на Извршниот комитет на партијата.
Иако дел од дипломатите веднаш предупредија на реториката на демонстрантите, посочија дека не смее да се дозволи да излезе од контрола протестот пред ДИК и дека треба да се остави комисијата да работи без притисок, појавувањето и говорот на Груевски, како и прогласот на ИК на ВМРО-ДПМНЕ, само уште повеќе ја вжештија атмосферата.
Потенцирајќи дека нема да дозволи „кантонизација и редефинирање на државата“ под никакви услови, Груевски изјави и дека ВМРО-ДПМНЕ во иднина нема да прифаќа нестандардни и хибридни решенија во ниту еден сектор, ако такви не постојат во земјите-членки на ЕУ, како и дека ќе се бори „за десоросоизација и јакнење на независен граѓански сектор“.
„И историски и во сегашноста, ВМРО-ДПМНЕ била и ќе биде прозападна партија и насочена кон ЕУ и НАТО!“, рече Груевски и порача да се зачува Македонија: „Ова ваше собирање е крик на совеста на секој граѓанин!“.
Но, Груевски истакна и дека одделни странски претставници се вмешувале „во правец на постизборен инженеринг“, и најави дека ВМРО-ДПМНЕ нема да учествува на состаноци и преговори во кои учествуваат амбасадори или други странски претставници, а на кои се носат одлуки за кои одлучуваат претставниците избрани од народот. „Никој да не може да ги фалсификува изборните резултати!“, изјави Груевски.
Во петокот вечерта, лидерот на ВМРО-ДПМНЕ се сретна со американскиот амбасадор Џорџ Бејли и со амбасадорот на ЕУ Самуел Жбогар, со кои, според провладините медиуми, разговарал за „скандалозната одлука на Државната изборна комисија”, за поништување на гласањето во едно гласачко место во Шестата изборна единица, и најавувајќи го прогласот на ИК донесен утредента, уште тогаш ги предупредил дека ВМРО-ДПМНЕ нема да прифати одлуките на ДИК, кои можат да ја променат прераспределбата на мандатите. Иако дипломатите потенцирале дека се очекува лидерство од политичките претставници, пред сé, за спречување на ескалирање на состојбите, според одделни медиуми, Груевски отворено се заканил, а тоа е потенцирано и во партиското соопштение, дека не можат да го контролираат револтот на народот, чии следни постапки не може да се предвидат, ако институциите не работат согласно законот.
Груевски му соопштил на амбасадорот Бејли дека составувањето на новото мнозинство за владина коалиција зависи и од влијанието на надворешните фактори, со ограда дека тој и сопратијците присутни на средбата – немаат овластување да го информираат за кои надворешни фактори се работи!
Тонот на партиското соопштение е јасна порака дека ВМРО-ДПМНЕ не ги осудува изјавите на говорниците – експонирани партиски личности, на демонстрациите пред ДИК, меѓу кои беше и пораката на Филип Петровски, директор на Државниот архив, упатена до неименуван амбасадор, „кој и онака е на заминување – да не ја провоцира повеќе Македонија!“
„ВМРО-ДПМНЕ нема дилема околу членството во НАТО, ЕУ и односите со САД, а најдобар доказ за тоа е потпишаната Декларација за стратешко партнерство, но тоа не значи дека некои поединци, партијата или државата, не можат да изразат некое несогласување со некои чекори на поединци кои ги претставуваат САД“.
Откако и евроамбасадорот Жбогар изразил загриженост од реториката која се користи од дел од говорниците на протестите пред ДИК, ВМРО-ДПМНЕ и нему му одговори со дел од соопштението: „Од партијата се потенцира дека е повеќе од две години загрижена од реториката, но и активностите кои беа преземани при протестите кои се случуваа во Македонија, како што беа палењето на канцелариите на претседателот на државата, кршењето и уништувањето на државен имот, обидите за насилно влегување и палење на штабот на ВМРО-ДПМНЕ, што беше спречено од полицијата и редица други слични постапки. Поддржуваме мирни демонстрации и не поддржуваме говор на омраза, но жалиме што Брисел и меѓународната заедница не изразуваа ваква загриженост и во претходните две години додека се одвиваа демонстрациите“, соопшти ВМРО-ДПМНЕ.
Според ВМРО-ДПМНЕ, и на средбата со норвешкиот амбасадор Арне Санес Бјорнстад, Груевски и високи партиски претставници порачале дека партијата „нема да дозволи спроведување на постизборен инженеринг“, како и дека „сериозното мешање на одредени преставници на меѓународната заедница во внатрешните работи на земјата и внатрешнополитичките и меѓупартиски работи“, е пракса која според ВМРО-ДПМНЕ – „треба да запре!“
Според изјавата на поранешниот евроамбасадор, ирскиот дипломат, Ерван Фуере за „24 Вести“, „ВМРО ДПМНЕ се дисквалификуваше од новата влада, бидејќи јасно се противи на спроведување на итните реформски приоритети и работата на Специјалното јавно обвинителство“.
