коментира: БИЉАНА ЈОРДАНОВСКА
Класичното опструирање на Државната изборна комисија од техничките опозициски министри и дополнителни заменици министри кои секое несогласување за нивните кадровски решенија од кое, како што тврдат, ќе зависи организација на изборите, па се жалат во оваа институција, очигледно ќе ги одбележи и деновите што доаѓаат до распуштање на Собранието и распишување на изборите.
За секое вакво барање од овој вид, се очекува ДИК да се прогласува и понатаму за ненадлежна. Во меѓувреме, во низата обврски што ги наметнува едно спроведување на избори, ДИК ќе треба, очигледно, да ги насочи и своите капацитети кон решение на проблемот со нееднаквиот број на гласачи во изборните единици.
Да разјасниме, ДИК испрати известување до Министерството за правда и до претседателот на Собранието, Талат Џафери, да постапи согласно своите надлежности, за да нема отстапување по член 4, став 7, според кој, бројот на избирачите во изборните единици може да отстапува најмногу од минус 5% до плус 5% во однос на просечниот број на избирачи во изборната единица. Две едници имаат помалку од просечната дозволена бројка, а две единици имаат повеќе од 5%. Како и во претходните изборни процеси со години наназад, Министерството ја префрла топката на ДИК, барајќи да предложат решение. А ДИК на тоа одговара: Ние не сме надлежни да вршиме прекројување на изборните единици. ДИК известува, постапува и толку. За овие прашања одлучуваат Владата, пратениците и пратеничките групи.
И да се вратиме на почеток. Техничка влада што треба да спроведе избори, а всушност работи на партиски агенди и кампањи? Пратеници и пратенички групи во кои најголем дел се само за да опструираат, блокираат, кочат? Ма неее…
Само е крајно неизвесно решавањето на важни прашања за кои со години се разговара, дебатира, лаже и ништо не се прави. Само тоа. Неизвесно е дали воопшто ќе се изгласаат измените во Изборниот законик за Изборниот модел, а за законско решение за родова еднаквост (50-50%) меѓу пратениците, можеме да сонуваме. Зависи од политичката волја на партиите дали ќе одлучат да имаат родова еднаквост во своите кандидатски листи, но законски решенија, тенка работа. Да не говориме за очекувањата да ги решат изборните единици?
И ДИК ќе спроведува избори? Да се надеваме дека нема крајниот резултат да биде: немаше нерегуларности, технички се помина како што треба, законот е супер, на Избирачкиот список сите на број и живи и мртви и фантоми и клонови….
И сето тоа поради технички кловнови…
БЛИЦ е рубрика на ЦИВИЛ МЕДИА во која објавуваме кратки, најчесто редакциски, коментари поврзани со веста на денот во рубриките ДНЕВНИК и ПОЛИТИЧКИ ОКЕЈ КОРАЛ, но и за други актуелни настани во земјата и во светот.
Сите права се задржани. Услови за користење, авторски права и заштита на приватноста.
