Израелски војници од Israel Defense Forces (ИДФ) задржаа, заплашуваа и малтретираа новинарска екипа на Си-ен-ен (CNN) додека известуваше од Западниот Брег – уште еден алармантен пример за притисок врз медиумите во зона на конфликт.
Според видеоматеријалите и сведоштвата, инцидентот се случува додека екипата известува за напад од израелски доселеници и поставување нелегален пункт во близина на палестинското село Тајасир. Според изјави на Здружението на странски новинари (FPA), војниците ги запираат новинарите, им наредуваат да престанат со снимање и им се закануваат со одземање на опремата. Според истите извори, ситуацијата дополнително ескалира кога еден војник физички нападна фоторепортер, го турка на земја и му ја оштетува камерата.
Од Си-ен-ен соопштија дека нивната екипа била задржана околу два часа, а снимките од инцидентот покажуваат вооружени војници кои им се закануваат на новинарите и локалните жители.
Овој инцидент не е единствен. Во услови на растечко насилство и радикализација на теренот, новинарите сè почесто се третираат како пречка, наместо како сведоци на настаните. Ограничувањето на нивната работа директно ја поткопува транспарентноста и ја отвора вратата за неконтролирани злоупотреби.
Новинарските организации го осудија настанот како сериозен напад врз слободата на медиумите, истакнувајќи дека новинарите сѐ почесто се изложени на закани и насилство додека известуваат од Западниот Брег и други конфликтни подрачја.
Израелската армија (ИДФ) потврди дека започнала истрага за инцидентот и јавно се извини за однесувањето на војниците, нагласувајќи дека тоа „не ги претставува вредностите на армијата“. Во меѓувреме, цел баталјон бил повлечен од операции на Западниот Брег и ќе помине дополнителна обука. Сепак, ваквите реакции сè почесто доаѓаат дури по јавен притисок и објавени снимки – што дополнително го засилува впечатокот за системски проблем, а не за поединечен инцидент.
Нападите, заплашувањата и попречувањето на новинарската работа не се само безбедносен проблем – тие се директен удар врз слободата на медиумите и правото на јавноста да знае. Во вакви услови, вистината станува колатерална штета.
Џ. Д. / М. Д.
