пишува: ЏАБИР ДЕРАЛА
Да беше било кој лумпен патриот од рангот на онаа, божем лева, а фашистичка братија од двакца без тројца, некое друго братство или сестринство, некоја Единствена Македонија или друга хулиганска збирштина во прашање, овој рафал немаше ни да помислам да го пишувам. Веројатно, ќе напишев пост на Фејсбук во стилот “Пуштете ги будалите, не вреди да се трошат зборови на нив”. Избегнувам да пишувам и за суштества со интелектуални и општествено политички капацитети и димензии далеку пониски и од оние кај растителните вошки, па така немаше да пишувам ни за авторката на повикот “Да им покажеме на северџаните…” да не беше во прашање системот. Зошто?
Затоа што има прес легитимација. И тоа, новинарка е на националниот телевизиски сервис, оној, реформираниот, во демократска земја, ослободена од режимските стеги на груевизмот. А дали навистина е? Прочитавме навреди, говор на омраза и повик на нереди по повод одбележувањето на Илинденското востание. Новинарка што ја плаќаме сите ние, нѐ подели на северџани и тие што таа ги смета за патриоти. И?
До моментов, нема реакција од институциите на државата во која постои национална стратегија “Едно општество за сите”, а се формираше и цело едно министерство за политички систем и односи меѓу заедниците… Не слушнав дека обвинителството покажало интерес да покрене кривична постапка.
Не видов ни некоја реакција, било каква, ни од матичната куќа на оваа новинарка чија величина е обратно пропорционална на нејзините примања што се астрономски, како што дознавам! Чичко Гугл ми исфрли на површина едно соопштение од ЗНМ во кое најголемото новинарско здружение во земјава ја зема новинаркава на МТВ во заштита и остро го осудува МВР за наводно попречување на нејзината работа. Како член на ЗНМ од 1989 година, со внимание ги читам и ги поддржувам соопштенијата на оваа организација. Сега се прашувам дали тоа е исправно. Но, еве, ќе почекам, можеби нешто ќе се случи по објавувањето на овој рафал. Не сум сигурен ни дека видов некоја реакција од невладините фолиранти, инаку декларирани партнери на владата во спроведување на стратегијата „Едно општество за сите“. Или, нема парички за проекат, па нема зошто да се заморуваат со вакви работи?!
Да се вратам на повикот за инциденти против државата. И на обидот за државен удар (27 април 2019) му претходеа вакви постови на социјалните мрежи. Овој повик и (отсуството на) реакцијата е илустрација за нефункционирањето на институциите, правната држава и граѓанското општество. Тажно, би рекла една Солза, качена на пивска гајба… На мизерен начин, преку оваа госпоџа новинарка, уште еднаш, по кој знае кој пат, гледаме потврда дека МРТВ е еден огромен, штетен, мрсен и зол паразит кој голта милиони евра наши пари.
И ќе повторам, не заслужува оваа личност, ниту нејзината постапка, толкав текст да се пишува. Таа е само рецка во нашиот мерач на глупоста и омразата. Тоа што алармира е инфицираноста на системот и отсуството на реакција. МРТВ е наша куќа, заедничка, ја плаќаме преку буџетот. Куќа што ни ја украдоа вакви суштества… Таа иста куќа, нашата куќа, плаќа илјадници евра месечна плата, за некој ваков лик? Па колку вакви има онаму, бре? Но, кога може Марјан Цветковски да биде директор на МРТВ, што да се зборува понатаму?
Дента кога се појави повикот, иако користев одмор, се вклучив во работата на моите другарки и другари кои веднаш реагираа на оваа фашисоидна онлајн акција на радикалите. Реагиравме, затоа што, без оглед на тоа колку тоа изгледа како индивидуален, квази патриотски чин, ова е дел од долгорочна стратегија за дестабилизација на земјата. Ова не е единствен повик на насилство врз институциите и врз националните симболи, од структури што ги има и во македонската и во албанската етничка заедница.
Природно е секој да очекува од институциите, ако ова е нормална држава, да реагираат веднаш и решително на секоја деструкција, пред таа да уништи грижливо градени односи. Мора од некаде да се почне!
Од каде толку остра реакција за еден “осамен пост на Фејсбук”? Прво, не е осамен. Јасно е дека зад ваквите “храбри” поединци се кријат поголеми и посериозни политички и финансиски спонзори и од дома и од надвор. Затоа, тие мора да се соочат со полната сила на законот. И општеството мора да се соочи со овие онлајн екстремисти, не со молк, туку со гласно отфрлање и осуда. А тие што организираат или поддржуваат вакви наци настани, треба да знаат: Илинденското востание им припаѓа на сите граѓанки и граѓани на Северна Македонија. Нема да им го дадеме! Нека го прочитаат Крушевскиот манифест за почеток, па ќе разговараме.
А великата новинарка, за неа е одговорен системот. Да го почекаме системот уште ден-два, да реагира. Ако системот не реагира, тоа ќе стане наша одговорност. До мигот кога тивкото мнозинство веќе нема да биде вака тивко и незаинтересирано. Или, па, да им го дадеме нашиот дом, а ние да си одиме?
Преземање на содржините e ЗАБРАНЕТО (!!!), освен со писмена дозвола од ЦИВИЛ и тоа исклучиво според Условите за користење, авторски права и заштита на приватноста. Повредата на авторските права е забранета со закон. Врз основа на договор за соработка, оваа содржина е достапна за Плусинфо и Слободен печат без ограничувања.
