Невладината организација Репортери без граници (РСФ) и нејзините партнери – Агенција Франс прес (АФП), Европска радиодифузна унија (ЕБУ) и Глобалната мрежа на уредници (ГЕН) денеска објавија нова иницијатива за борба против дезинформирањето на интернет, засновано на медиумска саморегулатива.
Новата мерка наречена Иницијатива за веродостојност на информациите (Journalism Trust Initiative – JTI) денеска е претставена на заедничка прес-конференција генералниот секретар на РСФ, Кристоф Делоар, директорката на информативниот сервис на АФП, Мишел Леридон, генералниот директор на ЕБУ, Ноел Каран и претседателот на ГЕН, Питер Бејл, кој се вклучи преку видео линк.
РСФ соопшти дека ЈТИ има за цел да се унапреди новинарството преку усогласени низа стандарди за веродостојност и транспарентност на информациите, што ќе бидат развиени и применети.
Стандардите ќе бидат воспоставени и реализирани под покровителство на Европскиот центар за стандардизација (ЦЕН), кој од денеска е отворен за учество на медиумите, професионалните здруженија и синдикати, саморегулативните тела и дигиталните платформи, компаниите кои се рекламираат и претставниците на интересите на потрошувачите.
– Во новиот систем на јавниот простор, во кој лажните информации циркулираат побрзо од точните, за да се одбрани новинарството треба да се запре таквиот тренд со давање на вистинска предност на сите оние кои на веродостоен начин произведуваат вести и информации, без оглед на нивниот статус, изјави Делоар.
Тој додаде дека очекува со новите стандарди да има поголема транспарентност за сопственоста и изворите на приходи на медиумите, како и за методите на новинарството и почитувањето на етичките норми и независноста. Според Делоар целта е нормите да станат доброволни и водечки во медиумската саморегулатива и добра пракса, како за блогерите така и за меѓународните медиумски групи.
– Осмисливме саморагулативен механизам врз основа на глобалните анализи во обласата на вестите и информациите, а кои овозможуваат задоволување на етичките и економските интереси. Убедени сме дека нашата иницијатива ќе помогне да се подобри интегритетот во јавната дебата, а истовремено ќе гарантира најширок плурализам и независност, наведе Делоар.
Американската компанија „Гугл“ најави дека ќе учествува во процесот на ЈТИ. Иницијативата е поддржана и од Светската федерација на огласувачи (WFA).
[divide]
извор: МИА
