Државната изборна комисија излезе со јавен повик за проверка на податоците во Избирачкиот список, за сите полнолетни гласачи, заклучно со 1 февруари 2017.
Јавен увид граѓаните можат да извршат на веб-страницата на ДИК или во подрачните одделенија и канцеларии, каде можат, по проверката, да побараат измена, дополнување или бришење на податоците од Избирачкиот список.
Имено, ДИК по предвремените парламентарни избри во 2016, освен со Финансиските извештаи за приходи и расходи на политичките партии во период од 21 ноември до 11 декември 2016 и Извештајот за спроведените предвремени избори за пратеници во Собранието на Република Македонија одржани на 11 декември 2016, имаше обврска за ажурирање на Избирачкиот список.
Со јавниот повик на 8 мај, по пет месеци недостапност за јавен увид, граѓаните повторно се соочени со можноста да не се пронајдат на Избирачкиот список и да поминуваат низ истата голгота за остварување на своето гласачко право.
ЦИВИЛ – Центар за слобода во своите извештаи и препораки од мониторингот на изборниот процес, постојано предупредуваа на последиците на непрочистениот Избирачки список, а непосредно пред изборите, поднесе преку 100 пријави на граѓани со одземено право на глас, за што, ниту граѓаните, ниту ЦИВИЛ, добија повратна информација од ДИК.
Оваа одлука на ДИК доаѓа во време кога треба да се одлучи за мандатите на градоначаниците, во политичка ситуација во која не се знае до когаќе бидат одложени локалните избори, а се поставува прашањето и дали за кратко време, ДИК, во истиот состав, ќе успеe во напорите за создавање услови за слободни и демократски локални избори.
Биљана Јордановска