ВЕСТ НА ДЕНОТ
Најрелевантни информации, ставови и препораки за изборите на настанот на ЦИВИЛ
ЦИВИЛ организираше конференција на тема: „Изборните реформи во пресрет на локалните избори: постигнувања и предизвици“, на која учествуваа министерот за правда, Бојан Маричиќ, Халил Снопче, пратеник и претставник од Алијанса за Албанците, потпретседателка на Државна изборна комисија Дитмире Шеху, Арбер Адеми, претставник на партијата ДУИ и Џабир Дерала од ЦИВИЛ.
„Како министерство за правда ќе негуваме институционален дијалог. Кај нас веќе има група која работи на измените на изборниот законик, и веќе направивме една, системот за верификација, со отпечатокот од прст. Едногласно во Собранието и со поддршка од скоро сите пратеници беше изгласана измената за фингерпринт“, истакна Маричиќ.
„Околу 200 апарати за отпечаток на прст ќе ни бидат достапни за да тестираме како ќе се одвива гласањето. Околу 4.000 апарати се предвидени за гласањето. Доколку не работи апаратот, тогаш ДИК ќе биде известен, но сепак гласачот ќе има право да гласа, додаде Шеху.
„Министерот го истакна фингер принтот, но јас кажувам дека во Македонија немаме проблеми со донесување закони, имплементацијата е проблем. Законот беше донесен требаше да се имплементира“, нагласи Снопче.
„Се залагаме за отворени листи за советници, тоа е тестирање на нашиот изборен модел кое ќе биде тест дали може да се имплементира и во парламентарните избори. Ние ја почитуваме волјата на гласачите и ја разгледуваме опцијата за еден круг гласање за градоначалник“, истакна Адеми.
„Државата има обврска да обезбеди максимални услови за искористување на правото на глас на секоја граѓанка и секој граѓанин“ – беше категоричен претседателот на ЦИВИЛ, Џабир Дерала.
ИЗЈАВА НА ДЕНОТ: Заев и Рама: Ние сме Европа, без разлика дали ЕУ ќе успее да ги тргне блокадите или не!
Претседателот на Владата на Република Северна Македонија, Зоран Заев и претседателот на Владата на Република Албанија, Еди Рама денеска, на маргините на Првиот Економски Форум во Скопје, имаа заедничка изјава на која го презентираа заедничкиот став за одлуката на Советот за општи работи на ЕУ да не одобри преговарачката рамка за Северна Македонија и Албанија.
ФЛЕШ ВЕСТИ
ПОДДРШКА Приоритет на владите мора да бидат кредибилни и одржливи реформи, а ЕУ мора да стои на своите заложби. Пристапот „вие испорачувате, ние испорачуваме“ мора да важи. Важно е пристапните преговори со Северна Македонија и Албанија да почнат што е можно побрзо, порача денеска германската амбасадорка Анке Холштајн, на првиот Скопски економски форум.
ЕКОНОМИЈА Министерот за економија, Крешник Бектеши се надева дека Регулаторна комисија нема да ја зголеми цената на електричната енергија, иако ЕСМ и МЕПСО побараа покачување. Посочи дека на седница на Влада вчера е донесена одлука за намалување на ДДВ на струјата од 18 на 5 проценти, што оди во прилог на граѓаните, како и да им се намалат трошоци во постковид периодот.
БЕЗБЕДНОСТ Приемот на Северна Македонија во НАТО минатата година претставува вистински регионален успех. Вашиот воен придонес кон Сојузничката команда за операции имаат витално значење за мирот и стабилноста на Западен Балкан и безбедноста на Европа, истакна командантот на Врховната сојузничка команда на НАТО за Европа, генерал Тод Волтерс на денешната средба со министерката за одбрана Радмила Шекеринска.
ЕВРОИНТЕГРАЦИИ Навистина е важно да видиме остварување на ветувањето за евро перспективите на регионот дадено во Солун. Ова е проблем на ЕУ и оваа блокада не се однесува само за иднината на Северна Македонија туку и на иднината на ЕУ во Западен Балкан, истакна вицепремиерот за европски прашања Никола Димитров на панел на Првиот економски форум Скопје.
ЧОВЕКОВИ ПРАВА Народниот правобранител изразува загриженост во однос на повторниот прекин на издавање на лични документи (лични карти, патни исправи, возачки дозволи и друго) од страна на Министерството за внатрешни работи и смета дека ваквиот потег сериозно ќе влијае на остварување на многу други права на граѓаните. Омбудсманот по сопствена иницијатива ќе ги испита евентуални пропусти во работењето на надлежните служби во МВР, кои би биле причина за прекините во издавањето на документите на граѓаните.
Дехран Муратов
