Поддршката од македонската дијаспора за Специјалното јавно обвинителство и за продемократските протести во Македонија постојано расте.
Од вчера, и Македонците од Канада се дел од Шарената револуција. Како што за ЦИВИЛ информираше Ацо Лукароски, пред македонскиот конзулат во канадскиот град Торонто се собрале стотина Македонци кои упатија протест за состојбите во нивната матична земја.
Со пораките испратени од собирот истакнати биле истите барања, кои секојдневно одекнуваат низ улиците во Македонија, а тоа се: прочистување на Избирачкиот список, избалансирано известување на националната МРТВ и другите медиуми со национална концесија. Исто така, нашите сонародници од дијаспората искажаа и силна поддршка за СЈО, со барање за формирање специјален суд со што ќе се обезбеди правично судење за сите обвинети.
Најважното барање, како што информираше Лукароски, е формирање преодна, техничка влада која ќе обезбеди услови и ќе спроведе слободни, фер и демократски избори.
“Пријатно изненадување беше тоа што меѓу присутните имаше и многу членови и симпатизери на ВМРО-ДПМНЕ кои што не се согласуваат со политиката на актуелното раководство на нивната партија”, објаснува Лукароски.
Марија Теговска
