Нови избори, но и дијалог меѓу најголемите партии од македонскиот блок, се излез од политичката криза во која се наоѓа Македонија, смета професорот д-р Саво Климовски, поранешен претседател на Собранието. Во краткото интервју за ЦИВИЛ Медиа, тој изрази сомнеж дека ќе се постигне согласност меѓу СДСМ и ДУИ и дека ќе се формира нова влада.
„Со оглед на преговорите коишто сега ги водат и со оглед на целото ова преиспитување, да не речам, малтретирање што албанските партии го прават, на чело со ДУИ, несоодветно на бројот на пратениците што ги имаат двете најголеми партии, ВМРО-ДПМНЕ и СДСМ, јас не сум голем оптимист дека што било ќе се испорача, било на едната, било на другата страна. Тоа веќе ми е сосем сеедно, дека ќе може да се реализира и дека ќе може да има една ефективна влада, од аспект на нејзина функционалност. Затоа, мислам дека предлогот да се оди на нови избори, можеби ќе биде реалниот избор, а дотогаш, ќе треба во Собранието барем еднаш да се соберат, ако ништо друго, барем на едно кафе и да ги разрешат овие тековни прашања, со завршување на таа продолжена седница што ќе биде за самораспуштање на парламентот“, изјави д-р Климовски за ЦИВИЛ Медиа.
„Јас не можам да разберам, тројца пратеници на една страна и тројца пратеници на друга страна, наместо да се соберат во онаа прекрасна зграда од Собранието и ако треба да ја најдат и свечената сала да се состануваат, тие се состануваат по некои хотели, партиски седишта, изигруваат големи преговарачи, па се внесуваат во тие нивни расправи, како, еве јас, да не знам што се преговори, како да не сум учествувал во тоа, и како да не го знам целиот циркус што се прави“, вели д-р Климовски, повикувајќи се на своето лично, досегашно искуство.
„И слободното пренесете: тоа е едно обично замајување, не се прави од какви било одговорни елити, туку е проблемот за средување на сопствените редови кај албанските партии. А, македонските партии најдобро е да седнат, барем тие да поразговараат. Не знам зошто се толку лути една на друга? Верувам дека новите избори ќе направат една сосем поинаква конфигурација на политичкиот естаблишмент во Република Македонија и дека после сето ова, граѓаните многу поодговорно ќе излезат на избори и ќе гласаат. Најрационално би било кога тие би излегле само еднаш, а тоа значи и за локалните и за парламентарните избори“, ни изјави д-р Климовски.
Моника Талеска
Камера: Дехран Муратов