Формирање комисија за утврдување одговорност за членовите на стручната комисија ангажирана за селекција и избор за најдобри авторски дела како дел од конкурсот за реализација на проектот „Млади поети“, како и поведување дисциплинска одговорност и суспензија на раководителот на Секторот млади, се мерките што ќе ги преземе Агенцијата за млади и спорт со цел да го расветли случајот со двете песни со недолична содржина кои беа објавени во збирката, а кои предизвикаа големо внимание во јавноста.
Агенцијата за млади и спорт како што информира на прес-конференција нејзиниот директор Дарко Каевски целосно се ангажира да ја лоцира одговорноста за случајот и да спречи повторување на вакви грешки во иднина.
– Утврдивме дека постоело несовесно, нестручно, непрофесионално работење на неколку чинители кои имале активна улога околу конкурост за издавањето на публикацијата на „Млади поети“. Таквото однесување довело до објавување на содржина која содржи елементи на родова и ентичка дискриминација на што АМС жестоко се противи, вели Каевски.
Додаде дека надворешната тричлена комисија составена од Јовица Иванов како претседател и Николина Андова Шопова и Тихомир Јанчоски како членови имала обврска да изврши селекција на пристигнатите творби и да постапи совесно, стручно и непристрасно согласно позитивните законски прописи во земјава.
Тие според Каевски требале да ги селектираат сите песни и разгледаат сите песни што пристигнале до нив, а не само да ги одбеерат најдобрите три, и за таа цел секој од нив би лплатен по пет илјади денари.
Каевски вели дека чувствува морална, но не и друг вид одговорност за објавување на збирката. Одговорноста за направениот избор и за содржината на збирката ја лоцира кај членовите на надворешната комисија, но и кај раководителот на секторот кој ќе биде суспендиран и кој ја доставил збирката до Арс Ламина.
Каевски вели дека во случајот постојат и видливи прекршувања на законски одредби од Законот за издавачка дејност.
– Како директор не сум дал никаква писмена и усмена согласност да бидам уредник, а притоа АМС неможе да биде издавач на збирката поезија „Млади поети“ , а овластеното лице неможе да биде уредник за истата имајќи ги предвид нормите во Законот за издавачка дејност, рече Каевски.
Овој проект се спроведува четири години, а оваа година првпат тој како директор и Агенцијата биле наведени како уредник и издавач. Претходните години тоа не било случај. Тој нагласи дека не дал согласност да биде уредник, а како тоа се случило дополнително ќе се утврди.
На прашањето како директор немал целосен увид во спроведувањето на овој проект се огради од одговорност и ја префрли врз раководителот на секторот.
Ова година за овој проект биле издвоени најмалку средства во споредба со претходните. Исто така и тиражот бил помал иако забелешките одеа во насока дека дури и познати поети не објавуваат во тираж повеќе од 500 примероци. Недистрибуираните примероци од „Млади поети“ се повлечени. Дополнително ќе се утврдува што ќе се прави со оние што веќе се пуштени во продажба.
Арс Ламина го добила тендерот за „Млади поети“ кој првично изнесувал 400 илјади денари, а потоа со наддавање го добила за околу 180 илјади денари, за печатење и дистрибуција.
Збирката е испечатена во 5.000 примероци, а АМС нема точна бројка колку досега се дистрибуирани.
Во врска со тоа дека двете спорни песни се објавени под украден идентитет, Каевски вели дека МВР веќе презеде иницијатива во врска со ова и ќе дејствува согласно своите надлежности. Песните се напишани од 41 годишниот Александар Блажевски, но во збирката како нивен автор е наведен Даниел Пиљаковски.
[divide]
извор: МИА