Косовскиот министер за внатрешни работи Џелал Свечла изјави дека Србија, под влијание на Русија, планира да го дестабилизира Косово со поддршка на српското малцинство на северот на земјата, кое веќе три недели протестира и ги блокира патиштата.
Србите во поделената Косовска Митровица, на северот на Косово, денеска подигнаа нови барикади, неколку часа откако Белград објави дека српската војска е во состојба на висока борбена готовност, по неколкунеделната ескалација на тензиите меѓу Белград и Приштина.
Токму Србија, под влијание на Русија, ја подигна состојбата на воена готовност и нареди да се подигнат нови барикади за да се оправдаат и заштитат криминалните групи кои ги тероризираат граѓаните од српска националност на Косово, истакна косовскиот министер.
Србија негира дека се обидува да го дестабилизира Косово и тврди дека сака само да го заштити српското малцинство. Српскиот претседател Александар Вучиќ изјави денеска дека Србија „ќе ја продолжи борбата за мир и ќе бара компромисни решенија“.
На прес-конференција со патријархот на Српската православна црква, Порфирије, кому еден ден претходно не му беше дозволен влез во Косово, Вучиќ ги обвини „Албанците и дел од меѓународната заедница“ дека нивната цел е да ги протераат Србите од северниот дел на Косово.
Крајната цел е исфрлање на Србија за сите времиња од Косово и Метохија, а особено протерување на апсолутно непослушниот српски народ, рече српскиот претседател.
Официјален Белград еден ден претходно соопшти дека Косово планира да ги нападне Србите и насилно да ги отстрани барикадите што тие ги подигнаа на северот на Косово, па и нареди на армијата да биде во највисока готовност, пренесува Индекс.хр.
Србите во Косово подигаат барикади од 10 декември, по апсењето на поранешен полицаец за наводен напад врз просториите на косовската Централна изборна комисија. „Уапсениот Дејан Пантиќ е обвинет за тероризам и напад на уставниот поредок“, изјави тогаш министерот Свечла.
Косовската Влада соопшти дека полицијата е подготвена да дејствува, но дека чекаат мировните сили на НАТО – КФОР на Косово да одговорат на нивното барање за отстранување на барикадите. Вучиќ нагласи дека се водат разговори со странски дипломати како да се реши ситуацијата.
Србите на Косово денеска во Митровица го блокираа патот што го поврзува мнозинскиот српски дел од градот со оној со албанско мнозинство.