ЦИВИЛ Медиа разговараше со спортскиот новинар Атанас Костовски на повеќе теми, но пред сѐ преку примери од неговиот живот и кариера за патриотизмот, национализмот, влијанието на медиумите, одговорноста на политичарите и претседателот, јазикот, меѓусебното разбирање на заедниците што живеат на овие простори, како и за референдумското прашање.
„Не сум ги делел луѓето и не ги делам на патриоти и предавници, затоа што Македонец се чувствува, а тоа чувство не е ни на лева ни на десна страна. Тоа чувство води напред, во подобро… Се сеќавам на еден мој пренос кога Македонија и Албанија играа во Тетово, меѓу првите натпревари веднаш по осамостојувањето на нашата репрезентација. По интонирањето на химната на Албанија реагираа Македонците. По интонирањето на македонската химна возвратија Албанците, оправдано. Проблемот е кој прв почна. Ако Македонците аплаудираа на химната на Албанија ќе беше добра лекција Албанците да не негодуваат на македонската химна. Било и ќе остане, мнозинството е одговорно како ќе се однесува малцинството“, изјави Костовски, обидувајќи се илустративно да ја прикаже релацијата на патриотизмот и национализмот.
„Во однос на законот за јазиците, мислам дека претседателот на Република Македонија покажа дека е претседател само на една политичка мисла и партија, а не на сите граѓани и граѓанки. Требаше да го потпише… Едноставно секој да се изживее на свој мајчин јазик…“, рече Костовски правејќи паралела со третманот на јазичните прашања во време на Југославија.
Што се однесува до медиумите и нивното влијание Костовски вели дека секој сега има право на мисла, на говор, но дека се претерува, особено на социјалните мрежи. Цитирајќи ја новинарката Емилија Лазаревска, тој вид на медиуми го оцени како место за збирање на ѓубриштето.
Кога станува збор за меѓусебните односи на заедниците, Костовски истакна дека ако се почитуваме со оној што е до нас без разлика на вера или од која партија доаѓа, сите недоразбирања ќе исчезнат. А за тоа како да се бориме против рушење на овие односи, говорот на омраза и национализмот, тој смета дека може да се бориме со одавање признание за добрите дела, без разлика чии се и од која партија или вера. Добрината, вели Костовски, некој друг ја измислил и ни ја оставил во наследство, а ние забораваме на добрите дела.
„Како да копаме дупка во неа да падне ривалот или конкурентот, а не да помислиме дека неговиот успех ќе ме повлече и мене да постигнам повеќе и нешто подобро за себе, за околината, за државата…“, вели Костовски.
Исто така, Костовски очекува претседателот Ѓорѓе Иванов, претседателот на Собранието, Талат Џафери и премиерот Зоран Заев, заеднички да излезат и да ги повикаат граѓаните да излезат на Референдумот. Според него тоа е нивна должност, особено на Иванов.
„Должност е на претседателот да ги повика граѓаните на Македонија да излезат и да го кажат своето „за“ или „против“. Не е претседател само на една партија… Го очекувам, сепак, единството на државниот врв за покана, а потоа кој како ќе гласа тоа е човеково право. Јас сум „за“… Обврска е на првиот човек на државата да ги повика гласачите да излезат да гласаат“, вели Костовски.
Костовски, посака рамноправност со сите што во општествено-политичкиот развој отишле многу подалеку од Македонија, алудирајќи на потребата за влез во ЕУ.
Биљана Јордановска
Камера: Атанас Петровски
Текстот е дел од проектот „Патриотизам ДА, национализам НЕ!“ што го спроведува ЦИВИЛ со поддршка од Цивика мобилитас. Содржината на овој текст е единствена одговорност на ЦИВИЛ и на ниту еден начин не може да се смета дека ги одразува гледиштата на Цивика мобилитас, Швајцарската агенција за развој и соработка (SDC) или организациите што ја спроведуваат.
