Уставните измени се регулирани согласно со законската процедура и тие во моментов се наоѓаат во работните тела на Владата, информира премиерот Димитар Ковачевски во гостувањето во вестите на Канал 5 телевизија.
Штом ќе биде завршено нивното финализирање и формализирање од технички аспект и содржински ќе бидат доставени до Парламентот каде што ќе отпочне процедурата. Во однос на дијалогот со ВМРО – ДПМНЕ, лидерската средба беше свикана од моја страна навистина со добра волја и со цел да изнајдеме заеднички јазик, обединето да ја донесеме оваа одлука. Бидејќи и за ВМРО – ДПМНЕ не е лесно, како голема партија во државата, опозициска партија, да не поддржи ниту една одлука стратешка за државата, ниту членството во НАТО, ниту преговарачката рамка, ниту договорот со Фронтекс, каде што за прв пат го имаме македонскиот јазик без никакви додавки, фусноти и појаснувања, на договор со сите други јазици членки на ЕУ, одобрен од сите земји членки на ЕУ, вклучително Бугарија и Грција. Сметам дека подавањето на рака за едно такво обединување е вистинскиот чекор. Се надевам дека и во ВМРО – ДПМНЕ, оние кои што се за европски интеграции на државата, за продолжување на европскиот пат, ќе успеат да го кажат својот глас, да го искажат своето мислење, и одлуките на партијата ќе бидат во насока, заедно ќе ги донесеме одлуките кои значат подобра иднина за државата мерена низ сите параметри ако се спореди со земјите кои што не биле членки на ЕУ а денес се членки на ЕУ, кажа Ковачевски.
Во однос на повикот на Христијан Мицкоски за ТВ дуел, премиерот одговори:
-Прво ние имаме многу јасни ставови после лидерската средба, многу јасни ставови соопштени преку прес конференција. Она што во моментов ни треба е продолжување на дијалогот на ниво на работни групи кои што ќе треба да ги договорат деталите на процесот како ќе се одвива во иднина. Бидејќи ако опозицијата ги кажа своите ставови, а тоа е дека нема проблем со вметнувањето на други делови од народи, вклучително и бугарскиот во нашата Преамбула, тоа го кажаа јавно. Со тоа дека се согласни да влезат во Владата, дека се согласни таа Влада да ги заврши уставните измени, да ги отвори поглавјата, да го заврши скринингот и т.н, и потоа да се оди на избори, прво со техничка Влада, согласно со закон и дека парламентот може да носи таква одлука, тогаш не гледам пречка зошто не би продолжила работата во работните групи. Сметам дека на граѓаните во моментот не им требаат безполесни дебати и дуели, на кои што ќе се искажуваат политички ставови кои што се вон политичкиот процес кој што се води. На граѓаните им треба обединетост, на државата и треба обединетост, за да можеме да го продолжиме европскиот пат на државата. Тој европски пат не е пат сам за себе, ниту пак одлуката е одлука сама за себе, тоа е еден од чекорите за остварување на втората цел на државата, после членството во НАТО, зачленување во ЕУ. А бенефитите се за граѓаните пред се, поголеми плати, поголеми пензии, повеќе работни места, повисок животен стандард, заклучи Ковачевски.