Кремљ одобрил тајна онлајн кампања чија цел е да му помогне на унгарскиот премиер Виктор Орбан да ја зајакне својата политичка позиција пред парламентарните избори следниот месец, објави лондонски „Фајненшл тајмс“, повикувајќи се на извори запознаени со планот.
Откритието доаѓа во чувствителен момент за Унгарија, додека Орбан – кој со години одржува блиски политички и економски врски со Москва – продолжува да се судира со Украина околу прашања поврзани со енергетиката и финансирањето од Европската унија.
Будимпешта во изминатите години повеќепати блокираше или одложуваше клучни пакети за помош на ЕУ за Украина, го продлабочи политичкиот јаз меѓу двете земји и предизвика сериозни тензии во рамките на Унијата.
Според извештајот на „Фајненшл тајмс“, руската консултантска компанија „Агенција за социјален дизајн“, која веќе е под западни санкции, подготвила стратегија за засилување на поддршката за владејачката партија Фидес на Орбан.
Планот предвидува внимателно дизајнирани пораки – осмислени во Русија – да се пласираат преку унгарски инфлуенсери на социјалните мрежи. Целта е содржината да се „вклопи“ во локалниот медиумски простор и да го претстави Орбан како единствениот лидер способен да го брани унгарскиот суверенитет и меѓународниот углед на земјата.
Во рамките на кампањата се предлагаат и таканаречени „информативни напади“ врз лидерот на опозицијата, Петер Маѓар, кој се наметна како најсериозен предизвикувач на Орбан на изборите закажани за 12 април. Неговата партија Тиса во моментов води во анкетите на јавното мислење, како што неодамна објави ЦИВИЛ МЕДИА.
Маѓар, за време на предизборната кампања повеќепати истакна дека руските разузнавачки служби се обидуваат да влијаат врз претстојните парламентарни избори.
Според извештајот на престижниот лондонски весник, руската операција има и поширока пропагандна цел: да ја претстави Унгарија како земја под контрола на Брисел и како држава која наводно е лишена од вистинска поддршка од ЕУ.
Објавата на „Фајненшл тајмс“ следува и по истражување на непрофитната аналитичка мрежа VSquare, која неодамна објави дека тројца офицери на руската воена разузнавачка служба ГРУ биле распоредени во руската амбасада во Будимпешта.
Во последните години, земјите членки на НАТО и ЕУ протераа десетици руски дипломати под сомнение дека се вклучени во шпионски активности, а истовремено воведоа и ограничувања за движењето на руските дипломатски мисии во рамките на европскиот блок.
Според „Фајненшл тајмс“, операцијата најверојатно ја надгледува Сергеј Кириенко, висок функционер во администрацијата на Владимир Путин, кој и претходно бил поврзуван со операции за политичко влијание во странство, вклучително и со руските кампањи насочени кон влијание врз американските претседателски избори во 2016 година, на кои победи Доналд Трамп.
Доколку се потврдат, овие наводи дополнително ќе ја зацврстат сликата за систематската стратегија на Кремљ да влијае врз изборните процеси во демократските држави преку дигитални операции, пропагандни мрежи и манипулација со јавниот дискурс во Европа и пошироко.
ЦМ Деск | Извор: Financial Times
