Според исказите на очевидци, скопски бизнисмен, го претепал Бранко Петровски вчера, околу 13 часот во најстрогиот центар на Скопје. Бизнисменот е сопственик на неколку хотели во центарот на Скопје, градежна фирма и неколку други бизниси. Во најнепосредна близина на еден од неговите хотели се наоѓа малата менувачница на Петровски и неговото кафуле „Гарсон“, повеќе години познато како омилено собиралиште на млади уметници, новинари и граѓански активисти.
Бизнисменот го извршил нападот врз Петровски во најнепосредна близина на неговиот хотел, изграден минатата година, откако претходно му го попречил патот и побарал од него да ја симне рекламата за неговата менувачница што таму е поставена пред 19 години. Откако Петровски мирно побарал од него да му дозволи да продолжи по патот, тој го нападнал со тупаници, го кутнал на земја и продолжил силно да го удира во пределот на лицето. Последиците од овој напад се видливи, скршена вилица и тешка повреда на левото око на Петровски.
Во текот на минатата ноќ, Петровски не е хоспитализиран затоа што немало место ниту во Градската болница, ниту на државната клиника, иако тоа го побарало неговото семејство, бидејќи обилно му крварел носот и не можел да заспие од болки и од тоа што се гушел во сопствената крв.
Соседството е крајно вознемирено и потресено од овој тежок инцидент. Го знаат Петровски како мирен, тивок и добар сосед, кој неодамна извојувал успешна битка со ракот. Поради хемотерапијата и лекарствата што сѐ уште ги прима, тој физички бил немоќен да се одбрани од жестокиот напад. Непосредно по нападот, бизнисменот му рекол дека му е криво што не го убил.
Полицијата, според неофицијални информации, го привела бизнисменот, иако тој се противел на приведувањето, затоа што се спремал да оди на свадба. Во овој момент, не е познато дали напаѓачот е во притвор или бил на свадба во текот на минатата ноќ.
