Денешна Европа се соочува со бројни предизвици. Според мое мислење, Европа изгледа прилично поделена. Оваа состојба е под влијание на континуираниот пораст на десничарските политики, христијанскиот радикализам, исламофобијата и меѓусебното неразбирање.
Ригидните десничарски политики повеќе не се феномен присутен само во традиционално десничарски општества како Унгарија, Словачка или Полска; денес овој феномен го гледаме и во либерални општества како Данска, Холандија, Германија и Франција, вели Адмир Лисица, директор на Центарот за геополитички истражувања „Геопол“ (Босна и Херцеговина), на панелот Европски и глобални перспективи на демократската отпорност.
Денес, за време на руската агресија врз Украина, се соочуваме и со малигното руско влијание во европските региони како Западен Балкан. Поточно, во Босна и Херцеговина, Црна Гора, но и тука, во Северна Македонија. Русија се обидува, преку своите прокси-актери – српските политичари во Босна и Херцеговина, како и официјална Србија – да ги комплицира односите во регионот, што директно би се одразило и врз остатокот од Европа.
Стравувам дека Европа недоволно разбира дека треба да ги насочи своите капацитети кон зајакнување на демократијата во балканските земји. На пример, Босна и Херцеговина и Бошњаците често се мета на различни српски и хрватски лобисти кои создаваат лажни пропагандни наративи насочени против бошњачките муслимани, на кои сакаат да им припишат радикализам кој не постои. Низ историјата, бошњачките муслимани ги заштитувале своите еврејски соседи за време на Втората светска војна, за време на османлиските освојувања, но и за време на последната српска агресија врз Босна.
Европа треба да знае колку Бошњаците се важни за европското општество и демократија и, наместо да дозволи нивна дехуманизација, Бошњаците како европски народ треба дополнително да се зајакнат. Ваквата состојба ѝ го олеснува на Русија вршењето влијание на Балканот. Затоа Европа мора да нè поддржи сите нас кои се бориме за европска перспектива, за влез во Европската Унија и за членство во НАТО.
Доколку сакаме мир во Европа во наредните години, геополитичката одлука број еден би била влезот на Босна и Херцеговина во НАТО. На тој начин Европа би ѝ помогнала не само на Босна и Херцеговина, туку и на целиот Западен Балкан, како и на самата Европа! Доколку Европа не сака нова Украина на Балканот, мора посилно да ги поддржи земјите во кои Русија се обидува да воспостави сопствена сфера на влијание.
Денес можеме да кажеме дека е неопходно да се промовираат идеи на единство, а не на поделби. Исто така, мора да развиваме меѓусебна доверба и да ја зајакнуваме соработката, каде што јас секако гледам простор за унапредување. Конечно, важно е Европа да ја разбере геополитичката позиција на земји како Босна и Херцеговина и Северна Македонија, кои имале и сè уште имаат многу проблеми со надворешни малигни влијанија, порача Лисица.
